პოლონეთის საელჩო მიესალმა საქართველოს მთავრობის სამშვიდობო ინიციატივას
Civil Georgia, Tbilisi / 6 Apr.'18 / 17:01

„პოლონეთის საგარეო საქმეთა სამინისტრო დიდად აფასებს და მხარს უჭერს საქართველოს მთავრობის მიერ გამოცხადებული ინიციატივების პაკეტს აფხაზეთის და ცხინვალის რეგიონის/სამხრეთ ოსეთის მოსახლეობისთვის“, განაცხადა პოლონეთის საელჩომ საქართველოში 5 აპრილს.

„ახალი ინიციატივა ხელს შეუწყობს ვაჭრობის განვითარებას, გაზრდის განათლების მიღების ხელმისაწვდომობას და მოსახლეობას საშუალებას მისცეს ისარგებლონ საქართველოს სახელმწიფოს მიერ შემოთავაზებული სხვა შესაძლებლობებით“, - ნათქვამია საელჩოს განცხადებაში.

საელჩომ ასევე აღნიშნა, რომ ახალი ინიციატივა „თბილისის მიერ კიდევ ერთი წინგადადგმული ნაბიჯია აფხაზეთის და ცხინვალის რეგიონის/ სამხრეთ ოსეთის მშვიდობიანი რეინტეგრაციის პროცესში“.

„პოლონეთი უპირობოდ მხარს უჭერს საქართველოს ტერიტორიულ მთლიანობას და მის სუვერენიტეტს საერთაშორისო თანამეგობრობის მიერ აღიარებული სახელმწიფო საზღვრების ფარგლებში“, - ნათქვამია საელჩოს განცხადებაში.

საქართველოს მთავრობის ახალ სამშვიდობო ინიციატივას, რომლის მიზანიც აფხაზეთის და ცხინვალის რეგიონის და დანარჩენი საქართველოს მაცხოვრებლებს შორის ეკონომიკური და ხალხთა შორის კავშირების გაფართოებაა, ასევე მიესალმნენ ევროკავშირი, აშშ და თბილისში აკრედიტებული სხვა უცხოელი დიპლომატები.

Civil.Ge © 2001-2024