პარლამენტის თავდაცვისა და უშიშროების კომიტეტის თავმჯდომარის გივი თარგამაძის განცხადებით, პრეზიდენტ სააკაშვილის ვიზიტი "როგორც მინიმუმ“ გადაიდო, რისი მიზეზიც რუსული მხარის უარია სააკაშვილი–პუტინის ორმხრივ შეხვედრაზე.

“ამის ნაცვლად იყო შემოთავაზებები უაზრო სეირნობაზე და დსთ–ს ფორმატით ურთიერთობაზე, რაც ჩვენ ინტერესებში ნამდვილად არ შედის... მიმაჩნია, რომ პრეზიდენტ პუტინს არ აქვს ახალი სათქმელი და ის ვერ არის ჩამოყალიბებული საბოლოოდ თავის დღევანდელ პოზიციაში და ვერც იმ დონის თავხედური გამოსვლებისთვის არის მზად, როგორსაც მისი [საგარეო საქმეთა და თავდაცვის] მინისტრები აკეთებენ ამ დღეებში“, – განაცხადა დღეს გამართულ პრესკონფერენციაზე გივი თარგამაძემ.

საპარლამენტო უმრავლესობის ერთ–ერთი ლიდერის გიგა ბოკერიას განცხადებით კი პრეზიდენტ პუტინს მიხეილ სააკაშვილთან საჯარო დებატებში შესვლა "ეშინია“.

მისი თქმით, მმართველი ძალის ამოცანაა რუსეთ–საქართველოს შორის პოლიტიკური დაძაბულობა განიმუხტოს, მაგრამ "არა ჩვენი ეროვნული ინტერესების ხარჯზე“.

"როგორც ჩანს,  რუსეთში ნება იმისა, რომ აგრესიული პოლიტიკა და საქართველოს ტერიტორიის ანექსიის მცდელობა შეიცვალოს, არ არსებობს“, – განაცხადა ბოკერიამ 21 ივლისს.

დეპუტატებმა ასევე განაცხადეს, რომ რუსეთი "ხელოვნურად ძაბავს“ ვითარებას სამხრეთ ოსეთის კონფლიქტის ზონაში.

“და ბუნებრივია ჩვენ ველით პროვოკაციების ესკალაციას. ჩვენ არანაირად არ დავუშვებთ ჩვენი მხარის სამხედრო ესკალაციაში ჩართვას და ამას გარანტირებულად ვამბობთ, მაგრამ მეორეს მხრივ, თუ იქ ვინმეს სიცოცხლეს საფრთე დაემუქრება, ამაზე პასუხის გაცემის საშუალება ქართულ მხარეს გააჩნია“, – განაცხადა გივი თარგამაძემ.