პრეზიდენტმა სააკაშვილმა 19 ნოემბერს განაცხადა, რომ მისი ადმინისტრაციის ფარგლებში ახალი სააგენტოს შექმნას გეგმავს, რომელიც სატრანსპორტო და ენერგეტიკული საერთაშორისო პროექტების კოორდინაციას განახორციელებს.

მისი თქმით, ეროვნული უშიშროების ყოფილი მდივანი კოტე კემულარია ამ სააგენტოს უხელმძღვანელებს. მთავრობაში განხორციელებული ცვლილებების შედეგად, კემულარიას განათლების მინისტრი ალექსანდრე ლომაია შეცვლის.

”მე გადავწყვიტე შევქმნა ახალი ერთეული პრეზიდენტის ადმინისტრაციის ფარგლებში, რომელიც სატრანსპორტო და ენერგეტიკულ პროექტებზე იმუშავებს და მე ვთხოვე კოტე კემულარიას უხელმძღვანელოს ამ სააგენტოს. ეს არის პიროვნება, რომელსაც აქვს უდიდესი გავლენა და უდიდესი გამოცდილება და ის არის კარგი სახელმწიფო მოხელე და ჩემი დიდი ხნის თანამებრძოლი,” - განაცხადა სააკაშვილმა.

საქართველოს ეროვნულ მუზეუმში ქართველ აკადემიკოსებთან და მეცნიერებთან შეხვედრაზე სააკაშვილმა განაცხადა, რომ საერთაშორისო სატრანსპორტო პროექტებს, კერძოდ ბაქო-ახალქალაქი-ყარსის სარკინიგზო პროექტს ”უდიდესი მნიშვნელობა” აქვს.

მისი თქმით, რეგიონალური სარკინიგზო პროექტის დაწყება, რომელიც აზერბაიჯანს და თურქეთს საქართველოს გავლით დააკავშირებს, ორ დღეში იგეგმება.

”ეს არის მართლაც საუკუნის პროექტი. იყო [ბაქო-თბილისი-ჯეიჰანის] ნავთობსადენის პროექტი მნიშვნელოვანი, მაგრამ ნავთობსადენი ადამიანებთან ისეთ შეხებაში მაინც არ არის, გარდა იმ ადამიანებისა, ვისაც ასაქმებს. მაგრამ ამ რკინიგზით საქართველო უერთდება ევროპული რკინიგზის ქსელს; საქართველო ჩიხი კი აღარ არის, არამედ ჩვენ თბილისში ჩავჯდებით მატარებელში და ჩამოვალთ პარიზში ან ლისაბონში იმიტომ, რომ რკინიგზა გადის ბოსფორის ქვეშ და მომავალში თურქეთის მთელ ხაზზე საქართველომდე ივლიან ჩქარი მატარებლები. ეს ნიშნავს,  რომ საქართველო გეოგრაფიულ რევოლუციას ახდენს, ჩვენ ვუერთდებით ამ [ევროპის რკინიგზის] ქსელს,” - განაცხადა სააკაშვილმა.

მან ასევე განაცხადა, რომ საქართველოს ”უფრო მოკლე გზა აქვს ევროპისკენ რუსეთის გავლით”. ”დარწმუნებული ვარ, რომ ეს გზაც გაიხსნება ადრე თუ გვიან, მას შემდეგ, რაც აფხაზეთის საკითხი გადაწყდება საქართველოს ერთიანობის სასარგებლოდ,” - დასძინა სააკაშვილმა.