ოქრუაშვილს საფრანგეთის სასამართლომ წინასწარი პატიმრობა შინა პატიმრობით შეუცვალა
სივილ ჯორჯია, თბილისი / 31 Jan.'08 / 11:31

თავდაცვის ყოფილი მინისტრს, ოპოზიციური მოძრაობა ერთიანი საქართველოსთვის ლიდერს ირაკლი ოქრუაშვილს საფრანგეთის სასამართლომ 30 იანვარს წინასწარი პატიმრობა შინა პატიმრობით შეუცვალა.

”ოქრუაშვილი იქნება შინაპატიმრობაში.ეკრძალება აეროპორტით და რკინიგზით სარგებლობა, ასევე კვირაში ორჯერ ვალდებულია გამოცხადდეს პოლიციაში,”- იტყობინება საქართველოს გენერალური პროკურატურა.

ოქრუაშვილი ნოემბრის ბოლოს ქართველი სამართალდამცავების თხოვნით გერმანიის მხარემ დააკავა და წინასწარი პატიმრობა შეუფარდა, თუმცა 10 იანვარს საფრანგეთს გადასცა, რადგან თავდაცვის ყოფილი მინისტრი პოლიტიკურ თავშესაფარს საფრანგეთს თხოვდა იმის გამო, რომ ის ევროკავშირის ტერიტორიაზე საფრანგეთის ვიზით მოხვდა.

ირაკლი ოქრუაშვილის ადვოკატმა და თანაპარტიელმა ეკა ბესელიამ  უარყო გავრცელებული ინფორმაცია ოქრუაშვილის გირაოთი გათავისუფლების თაობაზე.

მისი ინფორმაციით, საფრანგეთის სასამართლო ირაკლი ოქრუაშვილის საქართველოში ექსტრადირების საკითხს 27 თებერვალს განიხილავს. ბესელია იმედოვნებს, რომ სასამართლო არ დააკმაყოფილებს ოქრუაშვილის ექსტრადირების საკითხს და მას პოლიტიკურ თავშესაფარს მისცემს.

Civil.Ge © 2001-2021