ლევან გაჩეჩილაძის განცხადება 22 თებერვალს, პარლამენტის შენობის წინ


”მთელი ღამე თეთრად გავათენე იმიტომ, რომ სატელეფონო მოლაპარაკებები მქონდა ნინო ბურჯანაძესთან, ჩვენი მოთხოვნების შესაბამისად. მე ის ადამიანი არა ვარ, რომ ტელეფონს არ ვუპასუხო ან არ მოვისმინო სხვისი აზრი ამ უდიდეს, საპასუხისმგებლო სიტუაციაში. მე მაკისრია პასუხისმგებლობა ყოველი თქვენთაგანის წინაშე, საერთო სახალხო მოძრაობის წინაშე, ჩვენი პოლიტიკური პარტნიორის წინაშე და მთელი საქართველოს წინაშე. ამიტომაც სანამ აქ მოვიდოდი ჩემს ცხოვრებაში პირველად დავწერე ტექსტი, რათა áƒ•áƒ˜áƒ§áƒ თანმიმდევრული და არაემოციური:

”საქართველო არის ერთ-ერთი ყველაზე ისტორიული, ტრადიციული, ლამაზი, გეოპოლიტიკურად მსოფლიოში ყველაზე კარგ ადგილას განლაგებული ქვეყანა თავისი კაცთმოყვარე, უდიდესი ერით. ყველაზე დიდი განსაცდელი ამიტომაც აქვს სწორედ საქართველოს, მაგრამ ჩვენმა ქართველმა კაცთმოყვარე ერმა ძალიან კარგად და ლამაზად გამოიარა ყველა ის განსაცდელი და გასაჭირი, რაც აქამდე ჩვენ ქვეყანას თავს დაატყდა.

მე ყურადღებას აღარ განვავითარებ საქართველოს ისტორიაზე, მე უბრალოდ მინდა გაგახსენოთ ჩვენი უკანასკნელი ბრძოლის ისტორია - 28 სექტემბრიდან დღემდე.

ჩვენ გამოვიარეთ ერთმანეთის სიყვარული, გატანის, ბრძოლის დღეები. იმიტომ, რომ ჩვენ ხალხს და თქვენ ყველას აქვს უდიდესი პასუხისმგებლობა საქართველოს, თავისი სამშობლოს წინაშე.

უკაცრიელ ამინდში დიდი თუ პატარა, ქალი თუ კაცი, როგორც ერთი იდგა თავისი ღირსების და თავისუფლების დასაცავად და მე არასოდეს არ დამავიწყდება  - სწორედ ეს არის პასუხისმგებლობა რასაც სამშობლოს სიყვარული ქვია.

დღეს ისტორიული დღეა საქართველოსთვის და ჩავთვალე, რომ თქვენთვის მეთქვა რა ხდება ჩვენს ქვეყანაში:

ჩვენი ქვეყანა უმოწყალოდ იყიდება და სხვისი კერძო საკუთრება ხდება;

ორი ზესახელმწიფო გამუდმებით იბრძვის, რომ გავლენა მოიპოვოს ამა თუ იმ ფორმით ამ ქვეყანაში და დღემდე ამიტომაც ჩვენ დაკარგული გვაქვს მიწები და დღემდე გაურკვეველია მათი დაბრუნების ბედი. და ძალიან ბევრი საქართველოს მტერი დღემდე სარგებლობს ამ სიტუაციით;

ჩვენ არ გვაქვს რეალური თვითმმართველობა. არ არსებობს არცერთი ქალაქი და არცერთი სოფელი, სადაც ხალხს ჰქონდეს შესაძლებლობა, რომ თვითონ მართოს თავისი რჩეულით თავისი ბედი.

არცერთი სახელმწიფო ინსტიტუტი ქვეყანაში არ მუშაობს. ქვეყანაში მუშაობს მხოლოდ ერთი ინსტიტუტი - ეს არის პოლიცია, რომელიც მუშაობს ერთი ჯგუფისათვის ყველანაირი ბინძური მეთოდების და ხერხების გამოყენებით, რომელიც მუშაობს ერთი მუჭა ხალხისთვის, რომ სხვა ხალხზე იქონიოს ზეგავლენა და ძალმომრეობა;

დაღუპვის პირას არის ქართული კულტურა,  მეცნიერება, სპორტი, ჯანდაცვა თუ განათლება. ჩვენი მთელი თვითმყოფადობა არის მცდელობა დედაეკლესიის გახლეჩვის;

ეკონომიკური პოლიტიკა საქართველოში არ არსებობს, გამუდმებით იმატებს ფასები, შეუძლებელი გახდა ფიზიკური არსებობა თითოეული ჩვენთაგანისათვის;

ჩვენ ყველანი გავხდით ტყვეები ამ სიტუაციის და ჩვენ ავარჩიეთ უკომპრომისო ბრძოლის გზა იმიტომ, რომ ჩვენი ქვეყანა გადაგვერჩინა.

და სწორედ ამიტომ, მე რომ ჩემს სიტყვას ვწერდი, მინდოდა,  რომ ჩემი ადგილი ყოველი თქვენთაგანის ადგილზე დამეყენებინა, მაგრამ ეს ვერ შევძელი ერთი მარტივი მიზეზის გამო, რომ მე თქვენზე დიდი პასუხისმგებლობა მავალია მთელი ქვეყნის და თქვენს წინაშე.    

შექმნილ სიტუაციაში ყველაზე დიდი პასუხისმგებლობა მაქვს და მინდა, რომ ეს ყველამ ძალიან კარგად იცოდეთ. ამას ვერც ვერასდროს ვერ გავექცევი იმიტომ, რომ ეს პასუხისმგებლობა მე ყოველმა თქვენთაგანმა, ყოველმა ჩემმა ამომრჩეველმა დამაკისრა. ეს პასუხისმგებლობა შეიცავს უშეცდომოდ სიარულს ჩვენი ქვეყნის გადარჩენის გზაზე.

სწორედ ამიტომ, მიუხედავად თქვენდამი დაპირებისა და მიუხედავად იმისა, რომ ვიღაცამ ჩათვალოს, რომ მე არ შემიძლია ჩვენი თავგანწირვის თქვენთვის დანახება, თუმცა ამას შემდგომი მომავალი გვანახებს, მე დღეს გადავწყვიტე, რომ მოგმართოთ, რომ დღეს შევაჩეროთ შიმშილობის აქცია.

მე მივიღე მტკიცე გარანტია ხელისუფლებისაგან, ნინო ბურჯანაძისაგან, რომ პოლიტიკური პატიმრები იქნებიან გამოშვებულები, 26-ში [თებერვალს] საქართველოს ტელევიზიას ეყოლება ახალი დირექტორი, 15 მარტამდე საქართველოს ეყოლება ახალი ცესკო-ს თავმჯდომარე და ამ სიტუაციაში მოხდება ყველა საკანონმდებლო თუ საკონსტიტუციო ცვლილება, რომელიც საქართველოში მოიტანს თავისუფალ არჩევნებს და თავისუფალი არჩევნები, მგონია, საქართველოში მოიტანს იმ ხელისუფლებას, რომელიც დაამშვიდობებს ამ ხელისუფლებას ჩვენ ქვეყანას.

ამიტომ შეგნებულად დღეს არ მივდივართ სიტუაციის გამწვავებაზე ვფიქრობ, რომ ჩემში გამოვნახო ის ძალა, რომ კიდევ ერთხელ, მაგრამ უკანასკნელად ვირწმუნო ყველაფერი ამისა და მთელ მსოფლიოს ვანახო ჩემ მეგობრებთან თუ პოლიტიკურ პარტნიორებთან ერთად - მიუხედავად აზრთა დიდი სხვადასხვაობისა, სხვათა შორის ძალიან ბევრს ჰქონდა განსხვავებული აზრის დღევანდელ  დღეზე -  რომ ჩვენ   არა მარტო ქუჩის აქციები შეგვიძლია, არამედ ჩვენ ვართ ისეთი სერიოზული ხალხი, რომ მზად ვართ მოვიდეთ ხელისუფლებაში და ვმართოთ ეს ქვეყანა.

ჩვენ მთელ მსოფლიოს უნდა დავანახოთ, რომ ჩვენ არა ვართ ის ადამიანები, ვისაც მარტო სისხლით და ბრძოლით უნდა ხელისუფლების ხელში ჩაგდება. ჩვენი ჭკუით, ჩვენი გამოცდილებით, იმ გამოცდილებით, რაც ჩვენ გამოვიარეთ, გვძალუძს, რომ ხელისუფლებაში მოვიდეთ. 

სწორედ ეს არის ის დღე, როდესაც მე, ლევან გაჩეჩილაძემ ჩემ მეგობრებთან ერთად უნდა ავიღო ყველაზე დიდი პასუხისმგებლობა - ეს არის ჩემი პასუხისმგებლობა თქვენს წინაშე და მთელი საქართველოს წინაშე, დაპატიმრებული ხალხის წინაშე, მათი ოჯახების წინაშე, დევნილი ხალხის წინაშე, ყოველი თქვენთაგანის წინაშე და მთელი საქართველოს წინაშე. და პასუხი ვაგო ერთ მშვენიერ დღეს ამ გადაწყვეტილებაზე.

მე ვამბობ, რომ დღეს შიმშილობა არ იქნება, მაგრამ შიმშილობა მუდამ დარჩება ჩვენი ძლიერი იარაღი ამ ხელისუფლების წინააღმდეგ ბრძოლაში.

მაგრამ მე იმავდროულად ვამბობ და ეს მინდა მთელმა მსოფლიომ გაიგოს - აქ თუ მე კიდევ დავბრუნდი, დავბრუნდები ერთი მიზეზის გამო ან დავრჩები მე აქ ან ისინი ამ ქვეყანაში აღარ იქნებიან. სხვა მიზეზით მე აქ აღარ დავბრუნდები. ეს არის ჩვენი ურყევი რწმენა და ჩვენი მტკიცება იმაზე, რომ ჩვენ ბრძოლას ვაგრძელებთ. ამას თქვენ ნახავთ ხვალ და ზეგ”.