ბერეზოვსკი საქართველოში თავის გეგმებზე საუბრობს
სივილ ჯორჯია, თბილისი / 24 Mar.'08 / 11:16

ოლიგარქმა და ბადრი პატარკაციშვილის ყოფილმა ბიზნეს პარტნიორმა ბორის ბერეზოვსკიმ, განაცხადა, რომ იგი თავისი ფონდის ფილიალის ჩამოყალიბებას გეგმავს, რომელიც საქართველოში ”დემოკრატიულ ინსტიტუტებს გააძლიერებს”.

ტელეკომპანია ”რუსთავი 2”-ის გადაცემა ”კურიერი P.S.”-თან ჩაწერილ ინტერვიუში, მან საქართველოს ხელმძღვანელობას შეუტია და ”კორუმპირებული და ავტორიტარული” უწოდა, თუმცა ასევე გააკრიტიკა ოპოზიცია ხალხის მოლოდინების ვერ გამართლების გამო.

ინტერვიუში, რომელიც გადაცემის წამყვანს დავით კიკალიშვილს მიჰყავდა და რომელიც 22 მარტს გადაიცა ტელევიზიით, ბერეზოვსკიმ ასევე განაცხადა, რომ ჯოზეფ ქეის და მისი ადვოკატის ემანუელ ზელცერისნაირმა ”თაღლითებმა” ხელში ჩაიგდეს ”იმედი” და ცდილობენ პატარკაციშვილის დანარჩენი ქონებაც მიითვისონ ”დოკუმენტების გაყალბების” áƒ’ზით.

ინტერვიუს ჩვენების შემდეგ დავით კიკალიშვილმა კომენტარი გააკეთა და განაცხადა, რომ მიუხედავად ბერეზოვსკის მწვავე განცხადებებისა საქართველოს ხელისუფლების შესახებ, მას შთაბეჭდილება დარჩა, რომ ოლიგარქმა საბოლოოდ არ მოიჭრა საქართველოს ხელისუფლებისკენ მიმავალი გზები, ცდილობდა რა თავისი ფონდის გამოყენებას ”შანტაჟისა და ზეწოლისთვის”, რათა ”იმედისთვის” ბრძოლაში მომგებიანი პოზიცია დაეკავებინა.

ქვემოთ მოცემულია ინტერვიუს სრული ტექსტი:

რუსთავი 2: ბორის აბრამოვიჩ, საქართველოში გაგაჩნიათ რაიმე ბიზნეს ინტერესები? ვრცელდებოდა ინფორმაცია, რომ ბადრი პატარკაციშვილს თქვენი ვალი ჰქონდა და რომ მას ქონებას მისი áƒ“ეიდაშვილიც ედავება?

ბერეზოვსკი: რაც შეეხება ჩემს ბიზნეს ინტერესებს საქართველოში, სიტუაცია საკმაოდ რთულია, რადგანაც ყველაფერს, რასაც მე და ბადრი ვაკეთებდით, ვაკეთებდით როგორც თანასწორუფლებიანი პარტნიორები და ეს პარტნიორობა ფაქტიურად ოცი წელი ვრცელდებოდა - სულ ცოტათი ნაკლები. და სამწუხაროდ ჯერ კიდევ არ ვიცი - რადგანაც მე ბადრის გადავაბარე [ჩემი აქტივების] მართვა და ზოგიერთ შემთხვევაში მესაკუთრეობა, რადგანაც იცით, რომ სიტუაცია რუსეთში ჩემთვის ძალიან რთული იყო, მე რუსეთის ხელისუფლებასთან ომის ბილიკზე შევდექი და ამიტომაც, ჩვენი საერთო ბიზნესის დასაცავად მე ბადრის გადავეცი მართვის, და ზოგ შემთხვევაში საკუთრების უფლებებიც. ამიტომ ვერაფრით ვერ გიპასუხებთ თქვენ შეკითხვაზე მაქვს თუ არა რაიმე ბიზნესი საქართველოში, შესაძლოა ბადრიმ ზოგიერთი ჩემი აქცია სხვა ქვეყნებში არსებულ ბიზნესში გაცვალა. ამრიგად, ახლა ვცდილობ ამის გარკვევას, თუ რას ვფლობ სინამდვილეში და სად.

რაც შეეხება ბატონ ჯოზეფ ქეის, რომელიც ბადრის დეიდაშვილია, აქ ყველაფერი გასაგებია. მე მას ძალიან დიდი ხანია ვიცნობ, მასთან ჩემი პირველი შეხვედრის შედეგად დავასკვენი, რომ ის არ არის წესიერი ადამიანი და ამის შესახებ ბადრისაც ვუთხარი. მაგრამ ბადრი, რომელიც საკმაოდ ძლიერი ბიზნესმენი იყო, დიდ ყურადღებას არ აქცევდა არალოიალურ ადამიანებს, რადგანაც ყოველთვის სჯეროდა, რომ შეეძლო სიტუაციის კონტროლი.     

და როდესაც ბადრი გარდაიცვალა, ფაქტიურად მისი გარდაცვალებიდან მეორე დღეს გამოჩნდა ჯოზეფ ქეი - მას ასევე ქართული სახელიც გააჩნია[იოსებ კაკალაშვილი]; იგი ბადრისთან სახლში მივიდა ადვოკატთან ერთად, რომელიც წარმოადგინა, როგორც ემანუელ ზელცერი - იგი ყოფილი საბჭოთა ქვეყნიდან, მოლდოვადან არის წარმომავლობით. მათ წარუდგინეს ოჯახს უფლებამოსილება ყველაფერ იმის მართვაზე, რაც ბადრის დარჩა გარდაცვალების შემდეგ. შემდეგ, როგორც მე ვიცი, ისინი საქართველოში ჩავიდნენ და იგივე დოკუმენტები საქართველოს ხელისუფლებას წარუდგინეს და ასევე იმათ, ვინც უფლებამოსილი იყვნენ ემართათ ბადრის ქონება საქართველოში, კერძოდ ”იმედი”. მათ თავი წარმოადგინეს, როგორც ადამიანები, რომელთაც უფლება ჰქონდათ ემართათ ბადრის ქონება. ცოტა ხნის შემდეგ ცნობილი გახდა, რომ ესენი იყვნენ თაღლითები, რომელთაც დოკუმენტები გააყალბეს. რამდენადაც მე ვიცი, ამჟამად ბატონი ზელცერი ბელარუსის ციხეში იმყოფება, სადაც ასევე ცდილობდა ყალბი დოკუმენტების მეშვეობით ბადრის ქონების ხელში ჩაგდებას - ფაქტიურად იგივეა, რის გაკეთებასაც ჯოზეფ ქეი ცდილობდა საქართველოში, ასევე დიდ ბრიტანეთში, ამერიკაში და ისრაელში.

ამასთან დაკავშირებით, ბადრის მეუღლის ინას [გუდავაძის] ინტერესების დამცველმა ადვოკატებმა დაწერეს შესაბამისი წერილები, მათ შორის საქართველოშიც, საქართველოს მთავრობის თავმჯდომარის [პრემიერ-მინისტრ ლადო გურგენიძის] სახელზე, ასევე ბელარუსში და მთელ რიგ სხვა ქვეყნებში, სადაც მოჰყავთ მტკიცებულებები იმის თაობაზე, რომ ესენი თაღლითები არიან და აფრთხილებენ ოფიციალურ ხელისუფლებას მათთან თანამშრომლობის წინააღმდეგ, რადგანაც ამგვარ თანამშრომლობას აფასებენ, როგორც ორმხრივ თაღლითობას. როგორც მე ვიცი, ეს დოკუმენტი [წერილი] უკვე გააჩნია ქართულ მედიას.
   
რუსთავი 2: გინდოდათ ან გინდათ, რომ გახდეთ ტელეკომპანია ”იმედის” აქციონერი?
     
ბერეზოვსკი: იცით, მე არასდროს არ მქონდა მისწრაფება, რომ კრეატიული ინტერესი მქონოდა საქართველოში, რადგანაც ბადრი გადასარევად უმკლავდებოდა ამ ამოცანას. ბადრიმ შექმნა ყველაზე ძლიერი და ყველაზე გავლენიანი და არა მარტო ყველაზე გავლენიანი არხი, არამედ ყველაზე სანდო ტელევიზია, რომლის ინფორმაციასაც მოსახლეობის 80% ენდობოდა. ამიტომ არასდროს არ მიფიქრია, რომ დამოუკიდებლად შემოვსულიყავი საქართველოს მედია ბაზარზე.

რადგანაც მე უკვე ვთქვი, რომ აქტივებთან დაკავშირებული სიტუაცია ჩემთვის გაურკვეველია, და ვფლობ მე თუ არა რაიმე წილს ტელეკომპანია ”იმედში”, მე ვერ მოგცემთ პასუხს, ვარ თუ არა მე მფლობელი [”იმედის”]. მაგრამ სავსებით ნათელია, რომ მე არ მქონდა ბადრისგან განცალკევებული ბიზნესი, მათ შორის საქართველოშიც და ამაზე პასუხის გაცემა შეუძლია მხოლოდ იმ ანალიზს, რომლის ჩატარებაც ჩვენ იურისტებს დავავალეთ, პროფესიონალ ბრიტანელ იურისტებს, რომელთაც უნდა გასცენ პასუხი იმაზე, თუ კონკრეტულ ვინ რისი მფლობელი იყო.

რუსთავი 2: ახლა პოლიტიკის შესახებ. ნოემბრის მოვლენების დროს ბადრი პატარკაციშვილმა განაცხადა, რომ იგი ბოლო კაპიკსაც დახარჯავს საქართველოს ხელისუფლების წინააღმდეგ ბრძოლაში. როდესაც თქვით, რომ ბადრის საქმეს განაგრძობთ, გულისხმობდით თუ არა ამას?

ბერეზოვსკი: თქვენ ბადრის არასწორ ციტირებას ახდენთ. ბადრი ძალიან დიდხანს აცხადებდა, რომ არ სურდა პოლიტიკაში წასვლა. ის ყოველთვის მშვიდობიანი მოგვარების მომხრე იყო იმ დაპირისპირებისა, რომელიც მასსა და ხელისუფლებას შორის კი არა, არამედ ხელისუფლებასა და ხალხს შორის არსებობდა. სწორედ ამას მეუბნებოდა მე. მე მასთან ბევრ დროს ვატარებდი განსაკუთრებით მაშინ, როდესაც ის ლონდონში გადმოვიდა და ის მეუბნებოდა, რომ მას არ უნდოდა პოლიტიკაში წასვლა. იგი აიძულეს, რომ წასულიყო პოლიტიკაში, მათ შორის დაშინების, შანტაჟის, შეთქმულების მოწყობის გზით მისი მკვლელობის მიზნით - ეს ცარიელი სიტყვები არ არის, მე ყველა ჩემ სიტყვაზე პასუხს ვაგებ და ამის დამტკიცებაც
შემიძლია.

რაც შემეხება მე, იმ ტრაგედიამ, რომელიც მოხდა, რა თქმა უნდა, გარკვეული მორალური პასუხისმგებლობა დამაკისრა - სწორედ ამიტომაც განვაცხადე, რომ ბადრის საქმეს განვაგრძობ.

მისი საქმე არ ეხებოდა ხელისუფლების წინააღმდეგ ბრძოლას - საერთოდ ბადრი არასდროს არ იბრძოდა რაღაცის წინააღმდეგ, ის ყოველთვის რაღაცისთვის იბრძოდა - ამ შემთხვევაში ეს ბრძოლა მიზნად ისახავდა ქართველი ხალხისთვის მათი კონსტიტუციური უფლების რეალიზების შესაძლებლობის მიცემას. და ჩემი პირველი ვალდებულებაა, რომელიც პირველ რიგში ჩემი მეგობრის ხსოვნას უკავშირდება, რომ ეს საქმე გავაგრძელო.

როგორ გავაკეთებ ამას? მე გადასარევად ვიცი საქართველოს კონსტიტუცია, ქართული კანონები, მე ვიცი, რომ უცხოეთის მოქალაქეებს არ აქვთ უფლება მხარი დაუჭირონ პოლიტიკურ პარტიებს, მე არ ვაპირებ ამის გაკეთებას. ამავე დროს, მე ვიცი კანონი არასამთავრობო ორგანიზაციების შესახებ, ეს კანონი ანალოგიურია იმისა, რომელიც უმეტეს დემოკრატიული ქვეყნებში არსებობს - სხვა საქმეა, რომ ჩემი შეხედულებით საქართველომ დიდი ხანია შეწყვიტა დემოკრატიულ სახელმწიფოდ ყოფნა, მთავრობა კი მხოლოდ დემოკრატიის ფასადს ქმნის, სინამდვილეში კი ის [საქართველოს ხელისუფლება] უკვე გადაიქცა კორუმპირებულად და ავტორიტარულად.   

მე გადავწყვიტე გავხსნა სამოქალაქო თავისუფლებების ფონდის [რომელსაც ალექსანდრე გოლდფარბი თავმჯდომარეობს] ფილიალი საქართველოში. მე ეს ფონდი 2000 წელს ჩამოვაყალიბე, როდესაც იძულებული ვიყავი რუსეთიდან წამოვსულიყავი, პირველ რიგში, რუსეთში დემოკრატიული ინსტიტუტების მხარდასაჭერად. ეს ფონდი დღემდე ფუნქციონირებს და საერთო ჯამში 100 მილიონ დოლარზე მეტი დავხარჯე რუსეთის სამოქალაქო ინსტიტუტების მხარდასაჭერად.

მე აქტიურად ვუჭერდი მხარს ნარინჯისფერ რევოლუციას უკრაინაში და იქაც დიდი თანხები დავხარჯე. ამ ფონდის ფილიალი უკრაინაშიც არსებობს, ასევე ლატვიაში და ახლა მზად ვარ áƒ›áƒ¡áƒ’ავსი ფილიალი საქართველოშიც გავხსნა.

ეს იქნება გარკვეული გამოცდა საქართველოს ხელისუფლებისთვის, თუ როგორ იცავენ ისინი დემოკრატიული პრინციპებს - არა მხოლოდ სიტყვებით, რომელიც, ჩემი აზრით, საერთოდ არ შეესააბამება განხორციელებულ საქმეს - არამედ როგორ შეუძლია მათ საქმით დაამტკიცონ თავიანთი სიტყვები. ეს იქნება გამოცდა: მოგვცემენ უფლებას გავხსნათ ეს ფილიალი, თუ არა.

ეს ფონდი, რომელიც ქართულ კანონებთან სრულ შესაბამისობაში მოდის, დააფინანსებს სამოქალაქო ინსტიტუტებს, მათ შორის დამოუკიდებელ მედიას, საარჩევნო პროცესის მაკონტროლებელ კომიტეტებს - რამდენადაც ვიცი, 21 მაისს თქვენთან საპარლამენტო არჩევნები ტარდება - რათა თავიდან იქნას აცილებული ის გაყალბებები, რის გამოც ჩემი აზრით, და არა მხოლოდ ჩემი, არამედ ეუთოს საბოლოო დასკვნის მიხედვითაც, [5 იანვრის საპრეზიდენტო] არჩევნები არ შეიძლება ჩაითვალოს დემოკრატიულად. სწორედ ამგვარი ინსტიტუტების მხარდასაჭერად შეიქმნება ფილიალი, ისეთი ინსტიტუტების, რომლებიც შეიქმნა ხალხის მიერ და არა ხელისუფლების მიერ;  ჩვეულებრივი ხალხის ინიციატივების [მხარდასაჭერად], რათა გააკონტროლონ ხელისუფლება. 

რუსთავი 2: თუ შეხვედრიხართ ქართული ოპოზიციური პარტიების წარმომადგენლებს და ვინ მიგაჩნიათ ყველაზე პერსპექტიულად?

ბერეზოვსკი: სიმართლე რომ გითხრათ, მაინცდამაინც არ დავინტერესებულვარ ქართული პოლიტიკით. მე მხოლოდ მას შემდეგ დავიწყე ამის კეთება, როცა ბადრი აიძულეს პოლიტიკაში წასულიყო. როგორც ადამიანი, რომელსაც უზარმაზარი გამოცდილება აქვს პოლიტიკური ბრძოლისა რუსეთში და არა მხოლოდ რუსეთში, როგორც შემეძლო ვეხმარებოდი ბადრის. ამ დახმარების ფარგლებში მე შეხვედრები მქონდა ოპოზიციურ პოლიტიკოსებთან.

მე არა მხოლოდ ოპოზიციურ პოლიტიკოსებს ვხვდებოდი, მე ასევე ვხვდებოდი სააკაშვილს, როდესაც საქართველოში ჩამოვდიოდი, ასევე უგულავას, როდესაც ის პრეზიდენტის ადმინისტრაციის უფროსი იყო [2005 წელს].

საარჩევნო კამპანიის დროს მე შევხვდი ლევან გაჩეჩილაძეს [ოპოზიციური კოალიციის ლიდერს], ასევე [გიორგი] ხაინდრავას [ოპოზიციური კოალიციის წევრს], დავით გამყრელიძეს [ახალი მემარჯვენეების ლიდერს] და მათ ჩემი გამოცდილება გავუზიარე.

მიმაჩნია, რომ ქართველ ოპოზიციურ პოლიტიკოსებს კარგად ესმით სიტუაციის არსი, თუმცა არ გააჩნიათ საკმარისი ნება, რომ საქართველოს ხელისუფლების უკანონობას დაუპირისპირდნენ. სხვათაშორის, ანალოგიური სიტუაცია იყო უკრაინაში, როდესაც აღმოჩნდა, რომ ყველა უკრაინელი პოლიტიკოსი ჩამორჩა ხალხის ნებას, როდესაც იუშჩენკომ ფაქტიურად დაასამარა ხალხის მოლოდინები. ვფიქრობ, რომ იგივე ხდება საქართველოშიც. ვფიქრობ, რომ ოპოზიცია საკმაოდ ჩამორჩა ხალხის ნებას. როდესაც 100 000 ადამიანი გამოხატავს პროტესტს - და ჩვენ ვიცით, რომ ზოგიერთ აქციაზე 200 000 ადამიანიც áƒ˜áƒ§áƒ მისული - ხოლო ოპოზიცია უშვებს ამ ხალხს და ეუბნება, რომ ახლა ხელისუფლებასთან გავმართავთ მოლაპარაკებებს თქვენი სახელით... - იცით, არსებობს ასეთი რუსული ანდაზა: ხელს თუ აწევ, დაარტყი კიდეც.

მე არ მოვუწოდებ არაკონსტიტუციური ქმედებებისკენ, მაგრამ ოპოზიციას გააჩნია უზარმაზარი შესაძლებლობა იმოქმედონ კონსტიტუციის ფარგლებში. 7 ნოემბრის მოვლენა აშკარად არასკონსტიტუციური ქმედება იყო. ეს იყო სააკაშვილის რეჟიმის მხეცური პასუხი. და რა თქმა უნდა, ოპოზიციამ მიიღო მორალური უფლება, რათა შეცვალოს ეს რეჟიმი, რადგანაც ეს რეჟიმი ვერ ასახავს ქართველი ხალხის ნებას - ეს ჩემი შეხედულებაა, რომლის დასაბუთებაც შემიძლია. მე არ მესმის რა ინტერესი გააჩნია ოპოზიციას იმ ხალხის მისწრაფების ექსპლოატირებაში, რომელსაც სურს იცხოვროს თავისუფალ და დემოკრატიულ სახელმწიფოში. ეს არ არის ის, რასაც ხალხი მისგან [ოპოზიციისგან] მოითხოვს. 

თქვენ იცით, რომ მე შევხვდი ხაინდრავას უკვე ბადრის გარდაცვალების შემდეგ. ეს იყო áƒ¡áƒáƒ™áƒáƒœáƒ¡áƒ£áƒšáƒ¢áƒáƒªáƒ˜áƒ ხასიათის შეხვედრა, მინდოდა უკეთ გამეგო, თუ რა ხდება საქართველოში და ხაინდრავამ უბრალოდ ამიხსნა, როგორია ოპოზიციის შეხედულება არსებული სიტუაციის შესახებ.

რუსთავი 2:  ერთ-ერთ საგაზეთო ინტერვიუში თქვენ აღნიშნეთ, რომ ბადრის უღალატეს მისმა ახლობლებმა, ჟურნალისტებმა, პოლიტიკოსებმა...

ბერეზოვსკი: მე შემიძლია დავადასტურო ის, რომ ბადრის დიდად არ აღელვებდა ის ფაქტი, რომ ხელისუფლება მას დევნიდა - რაც, ჩემი აზრით, უკანონო იყო და ხელისუფლება მას დევნიდა, მათ შორის მის წინააღმდეგ შეთქმულების მოწყობის გზითაც - ბადრის უფრო აწუხებდა ის ფაქტი, რომ მას უღალატეს. ის ფიქრობდა, რომ მას უღალატა ყველამ,  ”იმედის” ჟურნალისტების ჩათვლით; მას მიაჩნდა, რომ ოპოზიცია ჩამოშორდა მას, რადგანაც შეეშინდა იმ პროვოკაციის, რომელიც სააკაშვილმა მოუწყო კოდუას დახმარებით. ვფიქრობ, რომ ამან ყველაზე მეტად ავნო მის ჯანმრთელობას. უამრავი ეჭვი მაქვს იმისა, რომ ეს შესაძლოა ყოფილიყო დაგეგმილი სიკვდილი, მათ შორის იმ ხალხის მიერ, რომლებიც ასე უეცრად გამოჩნდნენ პრეტენზიებით ქონებაზე, და ფაქტიურად ერთ დღეში მოაწერეს ხელი დოკუმენტს ”იმედის” გადაცემის თაობაზე.

ისეთი შთაბეჭდილება მრჩება, რომ ოპოზიციას ახლა უკეთ ესმის ის პასუხისმგებლობა ქართველი ხალხის მიმართ, რომელიც ადრე უგულებელყო.

რუსთავი 2: შესაძლებელია, რომ ფონდის [ქართული ფილიალის] თავმჯდომარე გიორგი ხაინდრავა გახდეს?

ბერეზოვსკი: შემიძლია ზუსტად განვაცხადო: არა. მინდა ხაზი გავუსვა, რომ ეს ფონდი პოლიტიზირებული არ არის. გამორიცხულია, რომ მას პოლიტიკოსმა უხელმძღვანელოს. ეს არის ფონდი, რომელიც ადამიანის უფლებებს უჭერს მხარს.

მე მზად ვარ ფონდის თავმჯდომარეობა შევთავაზო, მაგალითად ნონა გაფრინდაშვილს - ადამიანს, რომელიც ზოგადად საზოგადოებას წარმოადგენს და არა მის მხოლოდ იმ ნაწილს, რომელიც პოლიტიკურ ინტერესებს ასახავს. ამრიგად, ცალსახად შემიძლია განვაცხადო, რომ ხაინდრავა არ არის ის ადამიანი, რომელიც ფონდს უხელმძღვანელებს.

რუსთავი 2: ძალიან დიდი მადლობა.

 

Civil.Ge © 2001-2024