ევროკავშირის დიპლომატების განცხადება საპროტესტო აქციებზე
სივილ ჯორჯია, თბილისი / 24 Apr.'09 / 19:39

საქართველოში ევროკავშირის წევრი სახელმწიფოების წარმომადგენლობების ხელმძღვანელებმა, ევროკომისიის წარმომადგენლობამ და სამხრეთ კავკასიაში ევროკავშირის სპეციალურმა წარმომადგენელმა პიტერ სემნებიმ 24 აპრილს გავრცელებულ ერთობლივ განცხადებაში აღნიშნეს, რომ ისინი ”ყურადღებით ადევნებენ თვალყურს” საქართველოში მიმდინარე საპროტესტო აქციებს და პოლიტიკურ პროცესებს.

”დღეს, 2009 წლის 24 აპრილს, როდესაც ოპოზიციის მიერ მოწყობილი საპროტესტო მანიფესტაციებისა და ღონისძიებების მესამე კვირა დაიწყო, საქართველოში ევროკავშირის წევრი სახელმწიფოების წარმომადგენლობების ხელმძღვანელები, ევროკომისიის წარმომადგენლობა და სამხრეთ კავკასიაში ევროკავშირის სპეციალური წარმომადგენელი ადასტურებენ, რომ მშვიდობიანი შეკრების უფლება ყველა დემოკრატიული ქვეყნის მოქალაქის ერთ-ერთი ძირითადი უფლებაა,” - ნათქვამია განცხადებაში.

”ისინი მიესალმებიან იმ ფაქტს, რომ ოპოზიციამ და ხელისუფლებამ უზრუნველყვეს ამ უფლების მშვიდობიანად გამოყენება და ამ პროცესში დაწესებულებების ფუნქციონირებას და მოქალაქეების ყოველდღიურ ცხოვრებას მინიმალური დაბრკოლებები შეექმნა. ისინი კიდევ ერთხელ კვლავ მოუწოდებენ ყველა მხარეს, მკაცრად დაიცვან ქვეყნის კანონები და საზოგადოების მშვიდობიანი შეკრების წესები,” - ნათქვამია განცხადებაში.

”საქართველოში ევროკავშირის წევრი სახელმწიფოების წარმომადგენლობების ხელმძღვანელები, ევროკომისიის წარმომადგენლობა და სამხრეთ კავკასიაში ევროკავშირის სპეციალური წარმომადგენელი კიდევ ერთხელ მოუწოდებენ ყველა მხარეს ჩაერთოს სერიოზულ და კონსტრუქციულ დიალოგში, რომ გადაილახოს არსებული ჩიხური სიტუაცია და გატარდეს რეფორმები საქართველოში დემოკრატიის განმტკიცებისთვის. ისინი ადასტურებენ, რომ მზად არიან მხარი დაუჭირონ პოზიტიურ ნაბიჯებს ქვეყანაში დემოკრატიისა და კანონის უზენაესობის განსამტკიცებლად,” - დასძენს განცხადება.

Civil.Ge © 2001-2024