საზოგადოებრივი მაუწყებლის სამეურვეო საბჭო კიდევ ერთმა წევრმა დატოვა
სივილ ჯორჯია, თბილისი / 25 Apr.'09 / 13:31

საზოგადოებრივი მაუწყებლის სამეურვეო საბჭოს წევრმა მიხეილ ჭიაურელმა თანამდებობა დატოვა და შეუერთდა მისი სამი ყოფილი კოლეგის პროტესტს.

23 აპრილს 9-წევრიანი საბჭო დატოვეს ირმა სოხაძემ, მარინა ვეკუამ და გიორგი ანჩაბაძემ და მიზეზად არხის მიერ ოპოზიციის საპროტესტო აქციების არასრულყოფილად გაშუქება დაასახელეს.

ამჟამად საბჭოში 5 წევრი რჩება. დებულების თანახმად, მათ ფუნქციონირების გაგრძელება შეუძლიათ, რადგან მათი სხდომა უფლებამოსილია, როცა წარმოდგენილია წევრთა უმრავლესობა. გადაწყვეტილებები კი დამსწრეთა უმრავლესობით მიიღება.

კანონის თანახმად, ოთხი ვაკანტური ადგილის შესავსებად კონკურსს პრეზიდენტის ადმინისტრაცია 10 დღეში გამოაცხადებს. კონკურსის გამოცხადებიდან 30 დღის შემდეგ კი შეირჩევა სულ 12 კანდიდატი პარლამენტში წარსადგენად, საიდანაც პარლამენტი თითოეულ ვაკანტურ თანამდებობაზე წარდგენილ სამიდან ერთ კანდიდატს დაამტკიცებს.

სამეურვეო საბჭოს საზოგადოებრივი მაუწყებლის სარედაქციო პოლიტიკაში ჩარევის უფლება არ აქვს. მისი უფლებამოსილება ამ კუთხით შეზღუდულია და მოიცავს მხოლოდ არხის ძირითადი საპროგრამო მიმართულებების განსაზღვრას.

Civil.Ge © 2001-2019