ეუთო ადგილობრივი არჩევნების სადამკვირვებლო მისიას ოფიციალურად შეუდგა
სივილ ჯორჯია, თბილისი / 16 Apr.'10 / 17:16

ეუთოს დემოკრატიული ინსტიტუტებისა და ადამიანთა უფლებების ოფისი (ODIHR) დღეიდან ოფიციალურად შეუდგა 30 მაისის ადგილობრივი არჩევნების სადამკვირვებლო მისიის განხორციელებას.

მისიის 16 ექსპერტი უკვე თბილისშია; 24 გრძელვადიანი დამკვირვებელი კი საქართველოში მომავალ კვირას ჩამოვა და ქვეყნის მასშტაბით დააკვირდება საარჩევნო პროცესს - დაწყებული წინასააარჩევნო კამპანიიდან, შედეგების შეჯამების ჩათვლით.

გარდა ამისა, უშუალოდ არჩევნების დღისთვის დამატებით მოწვეულია 350 მოკლევადიანი დამკვირვებელი ეუთოს წევრი ქვეყნებიდან.

მისიის ხელმძღვანელია ოდრი გლოვერი, ბრიტანელი დიპლომატი, რომელიც 1994-1997 წლებში ODIHR-ის დირექტორი, ხოლო 2003 წლამდე ხუთი წლის განმავლობაში გაეროს ადამიანის უფლებათა კომისიაში ბრიტანული დელეგაციის ხელმძღვანელი იყო. ოდრი გლოვერი OSCE/ODIHR-ის საარჩევნო სადამკვირვებლო მისიებს ხელმძღვანელობდა ბელარუსში (2004), ყაზახეთში (2005), მაკედონიაში (2006) და უკრაინაში (2007).

”მომავალი ადგილობრივი არჩევნები იქნება მნიშვნელოვანი გამოცდა საქართველოს მიერ ნაკისრი ვალდებულებებისა, ჩაატაროს დემოკრატიული არჩევნები ეუთოს ვალდებულებების შესაბამისად,”- განაცხადა ოდრი გლოვერმა 16 აპრილს თბილისში გამართულ პრესკონფერენციაზე.

მისია ორ შუალედურ ანგარიშს მოამზადებს. არჩევნების მეორე დღეს გამოქვეყნდება ანგარიში წინასწარი დასკვნებისა და მონაცემების შესახებ. საარჩევნო პროცესის დასრულებიდან, დაახლოებით, რვა კვირაში წარმოდგენილი იქნება საბოლოო ანგარიში, განაცხადა ოდრი გლოვერმა.

Civil.Ge © 2001-2021