არჩევნების გაშუქების სატელევიზიო მონიტორინგის შედეგები
სივილ ჯორჯია, თბილისი / 8 May.'10 / 14:31

7 მაისს გამოქვეყნებული სატელევიზიო მონიტორინგის შედეგების თანახმად, თბილისის მერობის კანდიდატებს შორის, მოქმედ მერს გიგი უგულავას ექვსივე ტელეკომპანიამ, სადაც მონიტორინგი განხორციელდა, ყველაზე მეტი დრო დაეთმო. შემდეგ მოდის ალიანსი საქართველოსთვის ლიდერი ირაკლი ალასანია. 

ევროკავშირის დელეგაციამ  საქართველოში და გაეროს განვითარების პროგრამამ (UNDP) კავკასიის სკვლევითი რესურსების ცენტრს სამი ნაციონალური არხის - საზოგადოებრივი მაუწყებლის პირველ არხის, ”რუსთავი 2”-სა და ”იმედის”, და ასევე თბილისში მაუწყებელი სამი ტელეკომპანიის - ”კავკასიის”, ”მაესტროს” და ”რეალ TV”-ის მთავარი საინფორმაციო გადაცემების და რამოდენიმე შერჩეული თოქ-შოუების მონიტორინგი დაუკვეთა.

გარდა რაოდენობრივი კვლევისა,  ანუ რა რაოდენობის საეთერო დრო დაეთმო მერობის თითოეულ კანდიდატს და მათ შესაბამის პარტიებს, კვლევა ასევე იძლევა ინფორმაციას კანდიდატების ”გაშუქების ტონთან” დაკავშირებით.

იხილეთ ქვემოთ მოცემული ბმულები 16 აპრილიდან 5 მაისის პერიოდში განხორციელებული მონიტორინგის შედეგების დეტალების გასაცნობად:

კანდიდატების/პარტიებისადმი დათმობილი დრო, სატელევიზიო არხების მიხედვით - pdf

გაშუქების ტონი, სატელევიზიო არხების მიხედვით - pdf

მედია მონიტორინგი იმ პროექტის ნაწილია, რომელსაც ევროკავშირის დელეგაცია საქართველოში და UNDP ახორციელებენ. მათი განცხადებით პროექტის მიზანია, ხელი შეეწყოს მოსახლეობისათვის დაბალანსებული და ნეიტრალური ინფორმაციის მიწოდებას, რათა ამომრჩეველმა ინფორმირებული გადაწყვეტილება მიიღოს. 

მონიტორინგის შედეგებს სამოქალაქო საზოგადოების წარმომადგენლები და მედია ექსპერტები განიხილავენ ყოველკვირეულ გადაცემაში ”მედია მონიტორი,” რომელიც საზოგადოებრივი მაუწყებლის ეთერში პარასკევობით 23:00 სთ-ზე გადის.

პირველი გადაცემა 7 მაისს გავიდა, რომლის სტუმრები გაზეთ ”რეზონანსის” მთავარი რედაქტორი ლაშა ტუღუში, ილიას სახელმწიფო უნივერსიტეტის პროფესორი გიგა ზედანია და ისტორიკოსი ლაშა ბაქრაძე იყვნენ. სამივე სტუმარმა აღნიშნა, რომ ამ პირველი მონიტორინგის შედეგები შედარებით გაუმჯებესებულ სურათზე მიანიშნებს ტელევიზიების მხრიდან საარჩევნო კამპანიის გაშუქების დაბალანსებულობასთან დაკავშირებით, ვიდრე ეს წინა არჩევნების დროს იყო. თუმცა მათ ასევე აღნიშნეს, რომ კვლავ რჩება პრობლემები, მათ შორის, განსაკუთრებით კი ამას ხაზი ლაშა ტუღუშმა გაუსვა, ისეთი შემთხვევები როდესაც ტელევიზიები ზოგიერთი კანდიდატის ფარულ რეკლამას მიმართავს.

ცენტრალური საარჩევნო კომისიაც (ცესკო) ახორციელებს მედია მონიტორინგს არჩევნების წინ. 2 მაისს ცესკომ განაცხადა, რომ მან ამ მიზნით ქართული კომპანიები - პრაიმტაიმი, BCG და IPM დაიქირავა. ცესკომ ასევე დაიქირავა უკრაინული კომპანია, Pro.mova, რომელიც კომისიის თქმით áƒ›áƒáƒáƒ›áƒ–ადებს თვისობრივი და რაოდენობრივი  მონიტორინგის შუალედურ და დასკვნით ანგარიშებს.  შუალედური ანგარიშის გამოქვეყნება 11 მაისს იგეგმება.

Civil.Ge © 2001-2021