საქართველო ჩრდილოეთ კავკასიის რესპუბლიკების მაცხოვრებლებს უვიზო რეჟიმს უწესებს
სივილ ჯორჯია, თბილისი / 11 Oct.'10 / 19:00

13 ოქტომბრიდან ჩეჩნეთის, ინგუშეთის, ჩრდილოეთ ოსეთის, დაღესტნის, ყაბარდო-ბალყარეთის, ყარაჩაი-ჩერქეზეთისა და ადიღეს რესპუბლიკებში ჩაწერილი რუსეთის მოქალაქეებისთვის 90 დღიანი უვიზო რეჟიმი ამოქმედდება საქართველო საზღვრის გადაკვეთისას.

შინაგან საქმეთა სამინისტროს განცხადებაში ნათქვამია, რომ შესაბამის ბრძანებულებას პრეზიდენტმა სააკაშვილმა 11 ოქტომბერს მოაწერა ხელი.

საგარეო საქმეთა მინისტრის მოადგილემ, ნინო კალანდაძემ 11 ოქტომბერს განაცხადა, რომ ჩრდილოეთ კავკასიის რესპუბლიკებში მცხოვრები მოქალაქეებისთვის სავიზო წესების გამარტივება განაპირობა იმ ფაქტმა, რომ ყაზბეგი–ზემო ლარსის სასაზღვრო გამშვებ პუნქტზე ვიზები არ გაიცემა და ამ რესპუბლიკების მაცხოვრებლებს სახმელეთო საზღვრის გადმოკვეთისათვის ვიზების მისაღებად რუსეთის დედაქალაქში უწევდათ ჩასვლა.

"უპირველეს ყოვლისა, სურვილი გვაქვს აღვადგინოთ ტრადიციული ურთიერთობები ჩვენს მეზობელ ხალხთან,"– განაცხადა კალანდაძემ, "ამავდროულად ვიცით, რომ ძალიან ბევრ ადამიანს აქვს კომერციული ინტერესი ჩამოვიდეს საქართველოში; ასევე არის დაინტერესება საქართველოს უმაღლეს სასწავლებლებში სწავლისა. ამიტომ ყოველგვარი ზედმეტი ბარიერის არსებობა, ამ თვალსაზრისით, არ იქნებოდა მიზანშეწონილი".  

რუსეთსა და საქართველოს შორის ეს ერთადერთი ლეგალური სასაზღვრო გამშვები პუნქტი მარტიდან გაიხსნა. მანამდე, თითქმის 4 წლის განმავლობაში რუსული მხარის ინიციატივით მიმოსვლა ამ მიმართულებით შეწყვეტილი იყო.

საქართველოს რუსეთის მოქალაქეებისთვის ცალმხრივად დაწესებული აქვს გამარტივებული სავიზო რეჟიმი, რაც იმას ნიშნავს, რომ მათ აეროპორტებში, საქართველოს საზღვრის გადმოკვეთისას შეუძლიათ ვიზების აღება. 

Civil.Ge © 2001-2019