მესამე და საბოლოო მოსმენით საკონსტიტუციო ცვლილებებზე კენჭისყრა პარლამენტმა კვირის ბოლოსთვის გადადო მას შემდგე, რაც კანონპროექტი áƒ“ღევანდელ პლენარულ სხდომაზე განიხილა.

პარლამენტის თავმჯდომარემ დავით ბაქრაძემ განაცხადა, რომ კენჭისყრა 14 ან 15 ოქტომბერს შედგება იმის მიხედვით, თუ როდის გაიმართება პლენარული სხდომა, áƒ¡áƒáƒ“აც დარიგდება პროექტის უკვე საბოლოო, რედაქტირებული ვარიანტი.

გამომდინარე იქიდან, რომ 14 ოქტომბერი დასვენების დღეა, პარლამენტის სხდომა დიდი ალბათობით, პარასკევს, 15 ოქტომბერს უყრის კენჭს კანონპროექტის დამტკიცებას.

იმავდროულად, 15 ოქტომბერს არის დაგეგმილი საქართველოს კონსტიტუციურ პროექტზე მსჯელობა ვენეციის კომისიის პლენალურ სხდომაზე, სადაც საბოლოო რეკომენდაციებს მიიღებენ პროექტთან დაკავშირებით.

მეორე წინასწარი მოსაზრებების გამოქვეყნებისას, 8 ოქტომბერს ვენეციის კომისიამ მოუწოდა საქართველოს ხელისუფლებას დალოდებოდა მის საბოლოო რეკომენდაციებს, რათა საკონსტიტუციო ცვლილებების საბოლოო მიღებამდე "ზედმიწევნით გაითვალისწინოს“ ისინი.

ვენეციის კომისიის რეკომენდაციების მიმართ მხარდაჭერა აშშ–ის სახელმწიფო მდივანმა ჰილარი კლინტონმა 6 ოქტომბერს, ვაშინგტონში აშშ–საქართველოს სტრატეგიული პარტნიორობის კომისიის სხდომაზე საჯაროდ გამოთქვა საქართველოში საკონსტიტუციო რეფორმაზე საუბრისას.

თუმცა საკონსტიტუციო პროექტის დამტკიცების გადადება დეპუტატებმა ამ მოწოდებებსა და პოზიციებს პირდაპირ არ დაუკავშირეს.

„ჩემი სურვილია და ალბათ ყველა ჩვენგანის სურვილია, რომ ყველა ის პოლიტიკური შეთანხმება, რომელიც მიღწეული იქნა ძალიან რთული და ხანგრძლივი კონსულტაციების დროს სრულფასოვნად იყოს ასახული ტექსტში და არ დავკარგოთ არაფერი, რაზეც ფაქტიურად ამდენი ვიწვალეთ და შევთანხმდით,“– განაცხადა ბაქრაძემ კენჭისყრის გადადების მოტივაციაზე საუბრისას. 

კენჭისყრის გადადების ინიციატივა ქრისტიან–დემოკრატებიდან დეპუტატმა ლევან ვეფხვაძემ გააჟღერა და ეს იმ მოტივით მოითხოვა, რომ მისცემოდათ საბოლოო ტექსტის გასაცნობად დრო, იმის დასადგენად, „თუ რამდენად ადეკვატურია ეს ტექსტი და ჩვენი შეთანხმებები ერთმანეთთან“.

ვეფხვაძემ ერთ–ერთ მაგალითად დაასახელა, რომ არსებობდა მიღწეული შეთანხება პრეზიდენტის კანდიდატისთვის დაწესებულ ცენზთან დაკავშირებით, თუმცა ეს არ იყო ასახული ტექსტში. თუმცა ჯერ კიდევ 8 ოქტომბერს იურიდიული კომიტეტის სხდომაზე კანონპროექტის მესამე მოსმენით განსახილველ ტექსტში ასახული იყო ეს შეთანხმება და აღარ ფიგურირებდა პრეზიდენტობის კანდიდატისთვის ვალდებულება, რომ იყოს დაბადებით საქართველოს მოქალაქე. მანამდე არსებულ რედაქციებში კანდიდატი დაბადებით საქართველოს მოქალაქე უნდა ყოფილიყო.

იურიდიული კომიტეტის თავმჯდომარემ პავლე კუბლაშვილმა, რომელიც დეპუტატ აკაკი მინაშვილთან ერთად მიწვეულია ვენეციის კომიიის პლენარულ სხდომაზე სხდომაზე 15–16 ოქტომბერს, დაარწმუნა დეპუტატები უმცირესობიდან, რომ ტექსტში ყველა შეთანხმება ასახულია.

მან ასევე განაცხადა, რომ მთავრობისათვის უნდობლობის გამოცხადების პროცედურის ბოლო ეტაპზე ვადა კიდევ 5 დღით შემცირდება.

უნდობლობის პროცესს შესაძლოა 50–60 დღე დასჭირვებოდა, ან პრემიერ–მინისტრის კანდიდატურაზე პრეზიდენტის ვეტოს შემთხვევაში – 70–80 დღე. თავდაპირველად ეს ვადები კიდევ უფრო ხანგრძლივი იყო, თუმცა კანონპროექტის მეორე მოსმენის დროს ის 20 დღით შემცირდა, რაც, ვენეციის კომისიის თქმით, "პოზიტიური მოვლენაა, თუმცა არასაკმარისი.“

პარლამენტის რეგლამენტის თანახმად, კანონპროექტის მესამე მოსმენით მიღებისას ტექსტში მხოლოდ რედაქციული ცვლილებების შეტანა შეიძლება. შინაარსობრივი ცვლილებები შედის მეორე მოსმენის დროს. საკონსტიტუციო ცვლილებები პარლამენტმა მეორე მოსმენით 1 ოქტომბერს მიიღო.