მოსკოვი აცნობიერებს, რომ საქართველოს მხრიდან რუსეთის ვაჭრობის მსოფლიო ორგანიზაციაში (ვმო) გაწევრიანების გზაზე დაბრკოლების მოსახსნელად "გარკვეული კრეატიული გადაწყვეტაა“ საჭირო, განაცხადა აშშ–ის პრეზიდენტის ეკონომიკურმა მრჩეველმა ლოურენს სამერსმა 20 ოქტომბერს, თუმცა დეტალებზე, თუ როგორ შეიძლება მოგვარდეს ეს საკითხი, არ უსაუბრია.

სამერსმა, რომელიც პრეზიდენტ ობამას ეროვნული ეკონომიკური საბჭოს დირექტორია და რომელმაც მოლაპარაკებები გამართა რუსეთის ხელისუფლების წარმომადგენლებთან მოსკოვში, განაცხადა, რომ რუსეთის განაცხადი ვმო–ში გაწევრიანებაზე შესაძლოა წარმატებით დასრულდეს მომდევნო ერთი წლის განმავლობაში.

მან ასევე განაცხადა, რომ რუსეთის პირველ ვიცე–პრემიერთან გამართული "უაღრესად კონსტრუქციული“ მოლაპარაკებების დროს, საუბარი საქართველოს პოზიციასაც შეეხო.

ქართველმა მაღალჩინოსნებმა, მათ შორის პრემიერ–მინისტრმა ნიკა გილაურმა, რამოდენიმეჯერ გაიმეორეს ამ ბოლო დროს, რომ საქართველო მხარს უჭერს რუსეთის გაწევრიანებას ვმო–ში, მაგრამ მხოლოდ ერთი პირობით – რუსეთმა უნდა შეასრულოს ვმო–ს წესები.

კერძოდ, საქართელოს ხელისუფლების წარმომადგენლების თქმით, რუსეთმა უნდა უზრუნველყოს სეპარატისტულ აფხაზეთსა და სამხრეთ ოსეთში არსებული საბაჟო გამშვები პუნქტების "გამჭირვალობა“.

ოქტომბრის დასაწყისში თეთრმა სახლმა განაცხადა, რომ აშშ–მ და რუსეთმა "მნიშვნელოვან პროგრესს“ მიაღწიეს ორმხრივი საკითხების მოგვარების საქმეში და რომ რუსეთმა ვმო–ში გაწევრიანებისკენ "მნიშვნელოვანი ნაბიჯები“ გადადგა. 

"პრეზიდენტმა ობამამ პირობა დადო, რომ დაეხმარება რუსეთის მცდელობებს ბოლომდე მიიყვანოს დარჩენილი ნაბიჯები მრავალმხრივ მოლაპარაკებებში, რათა რუსეთმა რაც შეიძლება სწრაფად შეძლოს ვმო–ში გაწევრიანება,“ – განაცხადა თეთრმა სახლმა 1 ოქტომბერს რუსეთის და აშშ–ის პრეზიდენტების სატელეფონო საუბრის შემდეგ.