თბილისი რუსეთის ვმო–ში გაწევრიანების პირობებს არ ცვლის
სივილ ჯორჯია, თბილისი / 28 Oct.'10 / 11:33

საქართველო არ შეცვლის საკუთარ პოზიციას რუსეთის ვაჭრობის მსოფლიო ორგანიზაციაში (ვმო) გაწევრიანების პირობებთან დაკავშირებით, განაცხადა პრეზიდენტმა სააკაშვილმა "როიტერთან“ ინტერვიუში 27 ოქტომბერს.

"ჩვენ საკუთარ პრინციპებს დავიცავთ იმდენ ხანს, რამდენიც საჭირო იქნება,“ – განაცხადა სააკაშვილმა.

პრეზიდენტმა სააკაშვილმა ”როიტერს” ინტერვიუ მაროკოს ქალაქ მარაკეშში მისცა, სადაც ის მსოფლიო ეკონომიკური ფორუმს ესწრებოდა. 

საქართველო აცხადებს, რომ ის არ ეწინააღმდეგება რუსეთის გაწევრიანებას ვაჭრობის მსოფლიო ორგანიზაციაში, თუმცა იმ პირობით, რომ მოსკოვი "გამჭირვალეს“ გახდის სასაზღვრო–გამშვებ პუნქტებს სეპარატისტულ აფხაზეთსა და სამხრეთ ოსეთში.

"ჩვენ ჯერ კიდევ ვერ ვხედავთ დიდ სურვილს რუსეთისგან, რომ დაგვიკავშირდნენ ამ საკითხზე,“ – განაცხადა სააკაშვილმა, "ჩვენ მზად ვართ სერიოზული, აზრიანი მოლაპარაკევბებისთვის ამ საკითხებზე, მაგრამ ჩვენ გვაქვს გარკვეული საკითხები, რომელთა ყურადღების მიღმა დატოვება და იგნორირება მათ ვერ მოაგვარებს“.

 

Civil.Ge © 2001-2024