საარჩევნო რეფორმის ჯგუფის მუშაობის წესზე მსჯელობა გაგრძელდება
სივილ ჯორჯია, თბილისი / 17 Nov.'10 / 20:04

მმართველი და ოპოზიციური პარტიების წარმომადგენლები საარჩევნო  სისტემის რეფორმაზე მოლაპარაკებების ფარგლებში კიდევ ერთ შეხვედრას გამართავენ "ტექნიკურ ასპექტებზე“, ხოლო 1 დეკემბერიდან არჩევნებთან დაკავშირებული საკითხების არსებით განხილვაზე გადავლენ.

17 ნოემბერს ცესკოში გამართული მოლაპარაკებების მთავარი თემა გადაწყვეტილების მიღების წესი და სხვა პროცედურული საკითხები იყო.

შეხვედრის შედეგად მონაწილეებს შეთანხმების ოქმისთვის ხელი არ მოუწერიათ, თუმცა მათ აღნიშნეს, რომ გადაწვეტილების მიღების საკითხზე თავიანთი პოზიციები დააახლოვეს.

როგორც მოსალოდნელია, 24 ნოემბერს დაგეგმილ მომდევნო შეხვედრაზე, მოლაპარაკებების მონაწილეები შეთანხმდებიან, რომ ის გადაწყვეტილებები, რომლებზეც ისინი კონსენსუსის გზით მიაღწევენ შეთანხმებას, ავტომატურად იქნება მიღებული პარლამენტის მიერ, შემდგომი ცვლილებების გარეშე. თუმცა, ის საკამათო საკითხები, რომელზეც მხარეები ვერ მიაღწევენ კონსენსუსს, საკანონმდებლო ორგანოში იქნება განხილული, სადაც მმართველი პარტია უმრავლესობით არის წარმოდგენილი.

მონაწილეები იმ ადგილობრივი არასამთავრობო ორგანიზაციების ნუსხაზე შეთანხმდნენ, რომლებიც დამკვირვებლების სტატუსით დაესწრებიან მოლაპარაკებებს. ესენი არიან: სამართლიანი არჩევნების და დემოკრატიის საერთაშორისო საზოგადოება; საქართველოს ახალგაზრდა იურისტთა ასოციაცია; ახალი თაობა – ახალი ინიციატივა და საერთაშორისო გამჭირვალობა – საქართველო.

გარდა ამისა, მონაწილეები შეთანხმდნენ კიდევ ოთხი არასამთავრობო ორგანიზაცია დაასახელონ, რომლებიც ასევე დამკვირვებლის სტატუსით დაესწრებიან მოლაპარაკებებს. მხარეები შეთანხმდნენ, რომ რვა ოპოზიციური პარტია, რომელთაც საარჩევნო სისტემის რეფორმაზე  ერთობლივი წინადადებები áƒ¬áƒáƒ áƒáƒ“გინეს და ასევე მმართველი პარტია თითო–თითო არასამთავრობო ორგანიზაციას დაასახელებენ, ხოლო დანარჩენი მონაწილე პარტიები  – კიდევ ორს ერთობლივად.

პროცესის წარმართვას, მათ შორის შეხვედრების ოქმის მომზადებას უზრუნველყოფს საარჩევნო სისტემების საერთაშორისო ფონდი (IFES).

Civil.Ge © 2001-2021