საქართველო–რუსეთის მოლაპარაკებები ვაჭრობის მსოფლიო ორგანიზაციაში (ვმო) რუსეთის გაწევრიანების თაობაზე ორმხრივი საკითხია, რომელშიც ვაშინგტონი არ ერევა, განაცხადა პრეზიდენტ ობამას მრჩეველმა და დასძინა, რომ თბილისის სურვილია, რომ აქცენტი ვაჭრობასთან დაკავშირებულ კონკრეტულ თემებზე გააკეთოს ისე, რომ საკითხი "უფრო ფართო დებატის“ საგანი არ გახადოს.

“პროცესი მიმდინარეობს. მე არ მინდა წინასწარი დასკვნების გაკეთება, რადგან ჩვენ [ამ პროცესში] ჩართულები არ ვართ, მაგრამ მგონია რომ მოსკოვს  - მომლაპარაკებლებს ესმით, რომ ისინი საკითხს სერიოზულად უნდა მიუდგნენ და რომ ეს არ არის რაღაც ისეთი, რომ უნდა დაელოდნონ ჩვენი მხრიდან თბილისზე მოქმედებას, რადგან ჩვენ ამის გაკეთებას არ ვაპირებთ,” – განაცხადა პრეზიდენტ ობამას სპეციალურმა თანაშემწემ და ეროვნული უშიშროების საბჭოში რუსეთის და ევრაზიის საკითხების კურატორმა მაიკლ მაკფოლმა 4 მარტს.

"ამავე დროს, ვფიქრობ, რომ ხელისუფლებას თბილისში ესმის და სურს თანამშრომლობის გზით მოაგვაროს ეს საკითხი ისე, რომ აქცენტი კონკრეტულ ეკონომიკურ და სავაჭრო საკითხებზე გაკეთდეს და არ გადააქციოს ის უფრო ფართო დებატის საგნად. შემიძლია გითხრათ, რომ პროცესი მიმდინარეობს, თუმცა არ ვიცი სანამდეა ის მისული, ან სანამდე მივა,“ – განაცხადა მან. 

მაკფოლმა ეს განცხადება ჟურნალისტებთან სატელეფონო ბრიფინგის áƒ¤áƒáƒ áƒ’ლებში გააკეთა, რომლის დროსაც ის ვიცე-პრეზიდენტ ჯო ბაიდენის მომავალ კვირას რუსეთში დაგეგმილი ვიზიტის შესახებ საუბრობდა. ვიზიტისას რუსეთის მსოფლიო სავაჭრო ორგანიზაციაში გაწევრიანება განხილვის ერთ-ერთი საკითხი იქნება.

მაკფოლმა ასევე განაცხადა, რომ ვაშინგტომა მკაფიოდ განუმარტა მოსკოვსაც და თბილისსაც, რომ "რუსეთის ვმო-ში გაწევრიანება ამერიკის ეროვნულ ინტერესებში შედის“.

"მიგვაჩნია, რომ ჩვენი კომპანიებისთვის, ჩვენი ვაჭრობისთვის და ჩვენი ინვესტორებისთვის კარგი იქნება, თუ რუსეთი საერთაშორისო [სავაჭრო] წესების და რეგულაციების ვალდებულებას აიღებს, რადგან ეს რუსეთთან ეკონომიკურ ურთიერთქმედებას áƒ£áƒ¤áƒ áƒ პროგნოზირებადს გახდის,“ – განაცხადა მან.  
 
"და თუ ის არ იქნება პროგნოზირებადი, მაშინ შესაძლებელი იქნება ვმო–ს მექანიზმების გამოყენება, რათა მათ წინააღმდეგ პრეტენზიები გამოითქვას. ვფიქრობ, ეს კარგი რამ არის ჩვენთვის. ვვარაუდობ, რომ ეს საქართველოსთვისაც კარგი იქნება. თუმცა, საბოლოო ჯამში, მიმაჩნია, რომ ეს ორმხრივი [რუსეთ-საქართველოს] საკითხია და არა სამმხრივი [აშშ-რუსეთ-საქართველოსი],“ – დასძინა მან.

ქართველმა მაღალჩინოსნებმა რამოდენიმეჯერ გაიმეორეს ამ ბოლო დროს, რომ საქართველო მხარს უჭერს რუსეთის გაწევრიანებას ვმო–ში, მაგრამ მხოლოდ ერთი პირობით – რუსეთმა უნდა შეასრულოს ვმო–ს წესები. კერძოდ, საქართველოს ხელისუფლების წარმომადგენლების თქმით, რუსეთმა უნდა უზრუნველყოს სეპარატისტულ აფხაზეთსა და სამხრეთ ოსეთში არსებული საბაჟო გამშვები პუნქტების "გამჭირვალობა“.