საქართველო რუსეთის ვმო–ში გაწევრიანების მოთხოვნებს "არ გადახედავს"
სივილ ჯორჯია, თბილისი / 14 Jun.'11 / 11:24

საქართველო  ვაჭრობის მსოფლიო ორგანიზაციაში (ვმო) რუსეთის გაწევრიანების მოთხოვნებს არ გადახედავს, განაცხადა საქართველოს საგარეო საქმეთა მინისტრის მოადგილემ ნინო კალანდაძემ 13 ივნისს.

"არსებობს გარკვეული ტიპის მოთხოვნები, რომელთა გადახედვა ქართული მხარის მიერ არ მოხდება,“ – განაცხადა მან ბრიფინგზე, "ამას აცნობიერებს ყველა ჩვენი პარტნიორი, უპირველეს ყოვლისა, აშშ. მათ დამატებითი მოთხოვნები საქართველოს მიმართ არ აქვთ, არამედ აცნობიერებენ და აღიარებენ იმ ფაქტს, რომ საქართველოს სუვერენული უფლებაა დააყენოს ის მოთხოვნები, რომელსაც აყენებს და ეს მოთხოვნები ეხება, საქართველოს ტერიტორიაზე, საქართველოსა და რუსეთს შორის არსებული საზღვრების გამჭვირვალობის საკითხს, რაც სწორედ ამ ორ ქვეყანას შორის უნდა გადაწყდეს“. 

გასულ კვირას ოპოზიციურმა პოლიტიკოსმა კახა კუკავამ განაცხადა, რომ 1 ივნისს რომში აშშ–ის ვიცე–პრეზიდენტის ჯო ბაიდენის და პრეზიდენტ სააკაშვილის შეხვედრის შედეგად გადაწყდა, რომ საქართველო უარს ამბობს თავის მოთხოვნაზე  რუსეთის ვმო–ში გაწევრიანებასთან დაკავშირებით. კუკავას განცხადება ინტენსიურად გააშუქეს რუსულმა საინფორმაციო საშუალებებმა.

ნინო კალანდაძემ უარყო ამგვარი განცხადება და მას უსაფუძვლო უწოდა. მისი თქმით, საქართველოს მოთხოვნები "ძალაში რჩება“. 

შვეიცარიის შუამავლობით მიმდინარე რუსულ–ქართული მოლაპარაკებების მესამე რაუნდი 2 ივნისს იგეგმებოდა, თუმცა, როგორც ოფიციალური პირები აცხადებენ, ის „ტექნიკური მიზეზების“ გამო შვეიცარული მხარის თხოვნით გადაიდო .

 

Civil.Ge © 2001-2022