ორი ამერიკელი სენატორი რუსეთთან ვმო-ზე მოლაპარაკებებში თბილისის პოზიციების მხარდაჭერისკენ მოუწოდებს
სივილ ჯორჯია, თბილისი / 20 Oct.'11 / 12:10

ორმა ამერიკელმა რესპუბლიკელმა სენატორმა მოუწოდა ობამას ადმინისტრაციას სრულად გაითვალისწინოს საქართველოს ინტერესები ვაჭრობის მსოფლიო ორგანიზაციაში (ვმო) რუსეთის წევრობაზე თანხმობის მიცემამდე.

აშშ-ის სახელმწიფო მდივნის ჰილარი კლინტონის და ვაჭრობის საკითხებში აშშ-ის წარმომადგენლის რონ კერკის სახელზე გაგზავნილ წერილში, სენატორები როი ბლანტი და ჯეიმს ინჰოუფი ამბობენ: “გასაკვირი არ უნდა იყოს, რომ საქართველოს ხელმძღვანელობა საბაჟო პროცესის მეშვეობით მოითხოვს ტერიტორიული მთლიანობის რაიმე ნიშნის შენარჩუნებას მაინც”.

”ამგვარი აღიარების გარეშე, რუსეთის ვმო-ში გაწევრიანებაზე თანხმობა რუსეთის მიერ იარაღის ძალით დაკანონებული ახალი საზღვრის საერთაშორისო რატიფიცირების ტოლფასი იქნება. ვერ ვხედავთ, თუ როგორ შეიძლება ასეთი შედეგი შედიოდეს ამერიკის შეერთებული შტატების ეროვნულ ინტერესებში”, - ნათქვამია სენატორების წერილში.

სენატორების წერილი წინ უსწრებს რუსეთსა და საქართველოს შორის მოსკოვის ვმო-ში გაწევრიანების თაობაზე შვეიცარიის შუამავლობით მიმდინარე მოლაპარაკებების მომდევნო რაუნდს, რომელიც 20 ოქტომბერს იმართება.

”საქართველოს ხელისუფლებამ საჯაროდ განაცხადა, რომ ვერ დათანხმდება რუსეთის ვმო-ში გაწევრიანებას, თუ არ განთავსდებიან დამკვირვებლები (ელექტრონული დაკვირვების საპირწონედ) საერთაშორისო დონეზე აღიარებულ საქართველოს საზღვრებზე [სეპარატისტულ აფხაზეთსა და სამხრეთ ოსეთში]. საქართველო დათმობაზე წავიდა, როცა განაცხადა, რომ ეს ადამიანები შეიძლება იყვნენ საერთაშორისო და არა ქართველი, მებაჟეები”, - ნათქვამია წერილში.     

რუსეთის პრეზიდენტმა დიმიტრი მედვედევმა განაცხადა 19 ოქტომბერს, რომ რუსეთი ”გადაიტანს”, თუ ვერ გახდება ვმო-ს წევრი.

”რა თქმა უნდა, ჩვენ მზად ვართ [ვმო-ს წევრობისთვის], მაგრამ თუ გვეტყვიან, რომ ჩვენ შესაფერისები არ ვართ რაღაც მიზეზის გამო, ჩვენ ამას გადავიტანთ. ეს სავსებით ნათელია და მე აბსოლუტურად გულწრფელი ვარ”, - იტყობინება ”რია ნოვოსტი” მედვედევის სიტყვებზე დაყრდნობით.

”ყველას უნდა ესმოდეს, მათ შორის ჩვენს პარტნიორებს ვმო-ს გაწევრიანების პროცესში, რომ ეს არ არის მხოლოდ რუსეთის ინტერესი. ეს სხვადასხვა ბიზნესების, უცხოური ბიზნესის ინტერესებში და საერთაშორისო ვაჭრობის ნაკადის სწორი რეგულირების ინტერესებშია. ეს ორმხრივი მოძრაობის გზაა”, - დასძინა მან.

Civil.Ge © 2001-2022