შვეიცარიის პრეზიდენტი და საგარეო საქმეთა მინისტრი მიშელინ კალმი–რეი, რომლის ქვეყანაც შუამავლის როლს ასრულებს რუსეთ–საქართველოს შორის ვმო–ზე მიმდინარე მოლაპარაკებებში, 30 ოქტომბერს რუსეთის პრეზიდენტს დიმიტრი მედვედევს შეხვდა.

„დღეს განვიხილავთ ჩვენს ორმხრივ ურთიერთობებს. მაგრამ, რა თქმა უნდა, აზრი არ აქვს იმის დამალვას, რომ ჩვენ იმ სიტუაციის განხილვაც გვინდა, რომელიც ვაჭრობის მსოფლიო ორგანიზაციაში რუსეთის ფედერაციის გაწევრიანებასთან დაკავშირებით არსებობს“, – განაცხადა მედვედევმა შეხვედრის დაწყებამდე.

„მინდა მადლობა გადავუხადო შვეიცარიის კონფედერაციას იმ ძალისხმევის გამო, რომელსაც ის ახორციელებს როგორც შუამავალი, რათა გაამარტივოს რუსეთის გაწევრიანება ვმო–ში“, – დასძინა მან.

მიშელინ კალმი–რეიმ áƒ˜áƒ›áƒ”დი გამოთქვა, რომ შეხვედრა „ნაყოფიერი იქნება და შედეგები საშუალებას მისცემს რუსეთს წლის ბოლოსთვის, დეკემბერში გაწევრიანდეს ვმო–ში“. 

„ეს ჩვენც ძალიან გვინდა“, – განაცხადა მედვედევმა საპასუხოდ.

კალმი–რეის რუსეთში ვიზიტამდე სამი დღით ადრე თბილისმა განაცხადა, რომ ის შვეიცარიის მიერ რუსეთის ვმო–ში გაწევრიანების თაობაზე შემოთავაზებულ კომპრომისულ წინადადებას დათანხმდა.
  
საქართველოს ხელისუფლების წარმომადგენლების თქმით, წინადადების თანახმად, საერთაშორისო დამკვირვებლები კერძო კომპანიიდან „სავაჭრო დერეფნების თავში და ბოლოში განთავსდებიან და მონიტორინგს გაუწევენ რა შედის და რა გამოდის ამ დერეფნებში.” ეს სავაჭრო დერეფნები თავიანთი გეოგრაფიული კოორდინატების მიხედვით განისაზღვრება და არა სახელებით, რათა შენარჩუნდეს სტატუსის მიმართ ნეიტრალური მიდგომა. ქართული მხარის ინფორმაციით, კონტრაქტორ კომპანიას ნეიტრალური მესამე მხარე დაიქირავებს.

რუსეთმა განაცხადა, რომ მას წინადადების განსახილველად და პასუხის გასაცემად რამდენიმე დღე სჭირდება.