პრეზიდენტმა სააკაშვილმა განაცხადა, რომ ვმო–ზე რუსეთთან მიღწეული შეთანხმება დიპლომატიური გამარჯვებაა, რადგანაც პირველად აფხაზეთზე და სამხრეთ ოსეთზე კონტროლის დაკარგვის შემდეგ, თბილისისთვის ხელმისაწვდომი გახდება ინფორმაცია საზღვრის ამ მონაკვეთებზე ტვირთების მოძრაობის შესახებ.

მისი თქმით, თავდაპირველად რუსეთი ვაჭრობის ამგვარ საერთაშორისო მონიტორინგს კატეგორიულად ეწინააღმდეგებოდა; მოგვიანებით, რუსეთი მხოლოდ საზღვრის არასადავო მონაკვეთებზე მონიტორინგის წინადადებით გამოვიდა, განაცხადა მან და დასძინა, რომ თბილისმა მაშინვე უარყო ორივე ეს წინადადება. სააკაშვილმა განაცხადა, რომ მოლაპარაკებების მომდევნო ეტაპზე რუსეთი დათანხმდა მხოლოდ იმ ტვირთზე განხორციელებულიყო საერთაშორისო მონიტორინგი, რომელიც რუსეთიდან საქართველოში შედიოდა სეპარატისტული რეგიონების გავლით და არა იმ ტვირთებზე, რომელთა დანიშნულების ადგილიც სეპარატისტული რეგიონები იყო.

„ამ წინადადებების 5–6 ვარიაცები მოგვცეს და 5–6 სხვადასხვა ვარიაცია ჩვენ უარვყავით ბოლო თვეების განმავლობაში. საერთო ჯამში 10 სხვადასხვა წინადადება იყო, რომელიც იქნა უარყოფილი ქართული მხარის მიერ“, – განაცხადა სააკაშვილმა.

საბოლოო ჯამში, განაგრძო მან, მხარეები შვეიცარიელი შუამავლების დახმარებით შემუშავებულ წინადადებაზე დათანხმდნენ. ამ წინადადების თანახმად, განაცხადა სააკაშვილმა, შვეიცარიული მხარე, „რომელიც მოქმედებს საერთაშორისო თანამეგობრობის სახელით", ქირაობს „საერთაშორისო სერთიფიცირებულ მონიტორებს“ კერძო კომპანიიდან, რომლებიც საერთაშორისო ხელშეკრულებით ანგარიშვალდებულნი იქნებიან შვეიცარიის ფედერაციის წინაშე და áƒ‘ერნი ინფორმაციას თბილისს გაუზიარებს.

„პირველად, 1992–93 წლების შემდეგ, ჩვენ მივაღწიეთ იმას, რომ მუდმივ რეჟიმში მივიღებთ ინფორმაციას ყველა ტვირთის შესახებ, რომელიც შემოდის საქართველოს სუვერენიტეტულ ტერიტორიაზე საერთაშორისო დამკვირვებლების მეშვეობით, რომლებიც ანგარიშვალდებული არიან მესამე მხარის მიერ და ეს მესამე მხარე ვალდებულია ყველა ინფორმაცია მოგვაწოდოს ჩვენ“, – განაცხადა სააკაშვილმა. 

„ერთი სიტყვით, მე მიმაჩნია, რომ ეს არის ჩვენი დიპლომატიური გამარჯვება. რა თქმა უნდა, ჩვენი საბოლოო დიპლომატიური და ყველანაირი გამარჯვება იქნება მაშინ, როდესაც აქ იდგებიან არა მხოლოდ საერთაშორისო მონიტორები, არამედ იდგება საზღვრის აქეთ მხარეს საქართველოს საბაჟო და სასაზღვრო სამსახური და ჩვენ ამას ყველანი მივაღწევთ“, – განაცხადა სააკაშვილმა. 

„მაგრამ ის, რასაც დღეს მივაღწიეთ, ეს არის პირველი, ძალიან მნიშვნელოვანი დაფიქსირება იმისა, რაც არის საქართველოს საბაჟო საზღვრები“, – განაცხადა მან.

მან განაცხადა, რომ საქართველო ვერ გადაწყვეტდა ტერიტორიული მთლიანობის საკითხს ვმო–ზე მოლაპარაკებების პროცესში; მან ასევე განაცხადა, რომ საბოლოო შეთანხმება უსაფრთხოების თვალსაზრისითაც მნიშვნელოვანია.

„ჩვენ გვეცოდინება, რა ტვირთები მოდის და მოძრაობს და უსაფრთხოებისთვის არის ძალიან, ძალიან მნიშვნელოვანი, არა მხოლოდ ეკონომიკური [თვალსაზრისით]“, – განაცხადა სააკაშვილმა.

მან ასევე განაცხადა, რომ საერთაშორისო მონიტორინგი არის ის საკითხი, რაზეც საქართველო არ წავიდოდა კომპრომისზე რუსეთთან მოლაპარაკებების პროცესში.

„მე მგონი, ჩვენმა [დასავლელმა] პარტნიორებმა ეს ბოლოს კარგად გაითავისეს და გაიგეს, რომ საქართველო ერთ ნაბიჯს უკან áƒáƒ› პრინციპული პოზიციიდან არ დაიხევდა, ვისაც რა უნდა ეთქვა“, – დასძინა სააკაშვილმა.

მან ეს განცხადება ყვარელში, თავისი სახლის ეზოში áƒ’ამოფენილ საქართველოს რუკასთან გააკეთა. რუკაზე ის ხსნიდა, თუ სად განლაგდებიან კერძო კომპანიის დამკვირვებლები სავაჭრო ტვირთების მონიტორინგის მიზნით.