აფხაზეთის ოპოზიციური ჯგუფები რუსეთ–საქართველოს შორის ვმო–ზე შეთანხმებას აკრიტიკებენ
სივილ ჯორჯია, თბილისი / 8 Nov.'11 / 16:21

სეპარატისტული აფხაზეთის ორმა ოპოზიციურმა ჯგუფმა რუსეთსა და საქართველოს შორის ვმო–ზე მიღწეული ჯერ კიდევ ხელმოსაწერი შეთანხმება გააკრიტიკა, კერძოდ კი ის ნაწილი, რომელიც საზღვრის აფხაზეთის და სამხრეთ ოსეთის მონაკვეთებზე ვაჭრობის საერთაშორისო მონიტორინგს ეხება.

აფხაზეთის ომის ვეტერანთა კავშირმა „არუაამ“ და აფხაზეთის ხალხთა ერთობის ფორუმმა აღნიშნეს 7 ნოემბერს გაკეთებულ დამოუკიდებელ განცხადებებში, რომ საერთაშორისო მონიტორინგი დამოუკიდებელი სახელმწიფოს სტატუსის დაკნინების ტოლფასი იქნება, იტყობინება „აფსნიპრესი“.

აგვისტოში გამართულ ვადამდელ არჩევნებზე ორივე ამ ჯგუფმა ოპოზიციურ კანდიდატს, რაულ ხაჯიმბას დაუჭირა მხარი. ამ უკანასკნელმა ხმების, დაახლოებით, 20% მიიღო.

რუსეთსა და საქართველოს შორის მიღწეული შეთანხმების თანახმად, დამკვირვებლები კერძო კომპანიიდან, რომელთაც შვეიცარიელი შუამავლები დაიქირავებენ, საზღვრის რუსულ მხარეს განთავსდებიან და არა სეპარატისტული სამხრეთ ოსეთის და აფხაზეთის შიგნით; დამკვირვებლების კიდევ ერთი ჯგუფი საქართველოს კონტროლირებად ტერიტორიაზე განთავსდება, სეპარატისტული რეგიონების გარეთ.

„არუაამ“ განაცხადა, რომ იგი „შეშფოთებულია იმ სიტუაციის გამო, რომელიც აფხაზეთის რესპუბლიკის სახელმწიფო საზღვარზე შეიქმნა რუსეთის ფედერაციის ვმო–ში გაწევრიანების თაობაზე რუსეთსა და საქართველოს შორის მიღწეულ შეთანხმებასთან დაკავშირებით“.

„საერთაშორისო მონიტორინგის განხორციელების საბაბით, საქართველო ცდილობს აფხაზეთის და სამხრეთ ოსეთის სახელმწიფო საზღვრებზე კონტროლი დაამყაროს“, – განაცხადა „არუაამ“ და დასძინა, რომ ეს აფხაზეთის დამოუკიდებლობის დაკნინებისკენ გადადგმული „პირველი ნაბიჯია“.

კავშირმა მოუწოდა აფხაზეთის ხელმძღვანელობას „შეაფასოს ეს მოვლენები და შესაბამისი ზომები მიიღოს აფხაზეთის რესპუბლიკის სახელმწიფო სუვერენიტეტის დასაცავად“.

აფხაზეთის ხალხთა ერთობის ფორუმმა განაცხადა, რომ რუსეთ–საქართველოს შეთანხმების ის ნაწილი, რომელიც ვაჭრობაზე საერთაშორისო მონიტორინგს ეხება, აფხაზეთის უსაფრთხოებას საფრთხეს უქმნის.

„დაგეგმილმა საერთაშორისო მონიტორინგმა არავინ უნდა შეიყვანოს შეცდომაში. საქართველო ცდილობს არა მარტო გააკონტროლოს აფხაზეთის და სამხრეთ ოსეთის საზღვრები, არამედ დაიბრუნოს თავისი იურისდიქცია ამ დამოუკიდებელ სახელმწიფოებზე. ამრიგად, იმ დამოუკიდებელი სახელმწიფოს სტატუსის შემცირების პრეცედენტი იქმნება, რომლის გარანტადაც საერთაშორისო არენაზე რუსეთის ფედერაცია გამოდის“, – ნათქვამია განცხადებაში.

აფხაზეთის ხალხთა ერთობის ფორუმმა ასევე განაცხადა, რომ იგი შეშფოთებულია, რომ საკითხი, რომელიც პირდაპირ ეხება აფხაზეთს, რუსეთმა და საქართველომ სოხუმთან კონსულტაციების გარეშე განიხილეს.

Civil.Ge © 2001-2022