რუსეთთან ვმო–ზე მიღწეული შეთანხმება „ძალიან წარმატებულია“ საქართველოსთვის, განაცხადა 9 ნოემბერს საქართველოს საგარეო საქმეთა მინისტრის მოადგილემ ნინო კალანდაძემ და დასძინა, რომ ამ შეთანხმების ტექსტი, თანდართული რუკებით, áƒ£áƒáƒ®áƒšáƒáƒ”ს ხანებში გახდება საჯარო.

„წარმატებულია იმის გამო, რომ პირველად შესაძლებელი ხდება საქართველოს ტერიტორიების ოკუპაციის შემდეგ რუსეთსა და საქართველოს ოკუპირებულ ტერიტორიებს შორის ტვირთის მიმოქცევის საერთაშორისო ზედამხედველობა“, – განაცხადა მან.

სეპარატისტული რეგიონების გასწვრივ არსებულ საბაჟო პუნქტებთან ერთად ამ მონიტორინგის ქვეშ ყაზბეგი–ზემო ლარსის გამშვები პუნქტის მოქცევა, მისი თქმით, ნიშნავს იმას, რომ „რუსეთმა აღიარა ფაქტიურად, საქართველოსთან ერთიანი სავაჭრო რეჟიმი, რასაც ჩვენ ასევე მივესალმებით“.

“იმედს ვიტოვებთ, რომ რუსეთი მომავალში ასეთივე პრაგმატული იქნება იმ  საკითხებთან მიმართებაში, რომლებიც ჯერ კიდევ ძალიან პრობლემურად დგას რუსეთსა და საქართველოს შორის“, – განაცხადა კალანდაძემ და იმედი გამოთქვა, რომ რუსეთთან „სხვა რთული საკითხების მოგვარებაც მოხერხდება“.

თბილისი ასევე მიესალმა შვეიცარიელი შუამავლების მიერ გაწეულ ძალისხმევას მოლაპარაკებების პროცესში და ხაზი გაუსვა იმ გადაწყვეტილების მნიშვნელობას, რომ კერძო კომპანია, რომელიც განახორციელებს რუსეთსა და საქართველოს შორის ვაჭრობის მონიტორინგს, „ანგარიშვალდებული იქნება შვეიცარიის მთავრობის წინაშე, და არა მხარეების მიმართ“.