ბიძინა ივანიშვილის საზოგადოებრივი მოძრაობის პრეზენტაცია, რომელიც 25 ნოემბერს იგეგმებოდა, „დროებით გადაიდო“ ღონისძიების ჩატარების ადგილთან დაკავშირებით „ხელოვნურად შექმნილი წინააღმდეგობების გამო“, იტყობინება ივანიშვილის პრესსამდივნო 21 ნოემბერს.

ინფორმაცია საზოგადოებრივი მოძრაობის „ქართული ოცნება“ დაფუძნების გეგმებზე, რომელსაც ბიძინა ივანიშვილი უხელმძღვანელებს, პირველად 3 ნოემბერს გავრცელდა და მაშინ საუბარი იყო, რომ ეს ღონისძიება ფილარმონიაში უნდა გამართულიყო.

თუმცა 21 ნოემბერს გავრცელებულ განცხადებაში პრესსამდივნო აღნიშნავს, რომ 25 ნოემბრისთვის ფილარმონიის ნაწილი, ე.წ. ივენთ-ჰოლი დაკავებულია და „ისედაც შეზღუდული სივრცის“ დარბაზში  „პრეზენტაციის გამართვა შეუძლებელი გახდებოდა და საზოგადოების უკმაყოფილებას გამოიწვევდა“. 24–27 ნოემბერს ივენთ–ჰოლში თბილისის მოდის კვირეული გაიმართება. 

პრესსამდივნოს ინფორმაციით, ღონისძიების პოტენციურ ადგილებად სპორტის სასახლე და მიხეილ მესხის სახელობის სტადიონი შეირჩა, რომელთა ადმინისტრაციებთან 3 ნოემბრიდან მოყოლებული ივანიშვილის წარმომადგენლები აწარმოებდნენ მოლაპარაკებებს 25 ნოემბრიდან 10 დეკემბრის პერიოდში ნებისმიერ დღეს ფართის დაქირავების მიზნით, რათა „ყველა მსურველს ჰქონოდა „ქართული ოცნების“ პრეზენტაციაზე დასწრების საშუალება“.

პრესსამდივნოს ცნობით, სპორტის სასახლის ხელმძღვანელობამ  უკვე დაგეგმილი ღონისძიებების მოტივით ფართის დათმობაზე სიტყვიერი უარი განაცხადა, რის შემდეგაც მათ ოფიციალური წერილი გაეგზავნათ, რაზეც პასუხი ამ დრომდე არ გაუციათ.

პრესსამდივნოს განცხადებით, პრეზენტაციის ახალი თარიღი, სავარაუდოდ, უახლოეს დღეებში გახდება ცნობილი.

ფილარმონია 2000 მაყურებელს იტევს, სპორტის სასახლე – 11 ათასს, ხოლო  მიხეილ მესხის სახელობის ე.წ ლოკომოტივის სტადიონი 24 680 მაყურებელზეა გათვლილი.