პრეზიდენტი სააკაშვილი 12 მარტს თბილისში აშშ-ის თავდაცვის დეპარტამენტის მაღალი რანგის დელეგაციას შეხვდა, ბირთვული, ქიმიური და ბიოლოგიური თავდაცვის საკითხებში აშშ–ის თავდაცვის მდივნის მოადგილის ენდრიუ ვებერის ხელმძღვანელობით.

შეხვედრაზე, რომელშიც ასევე მონაწილეობდა ამერიკის ვოლტერ რიდის საჯარისო კვლევითი ინსტიტუტის ხელმძღვანელი, საქართველოს–აშშ–ის ურთიერთობისა და თანამშრომლობის გაღრმავების მიზნით კონკრეტული მიმართულებები და დარგები განიხილეს.

„მხარეებმა საქართველოსთვის და, ზოგადად, რეგიონისთვის ქართულ-ამერიკული საზოგადოებრივი ჯანდაცვის ცენტრალური რეფერალური ლაბორატორიის განვითარების პერსპექტივებზე იმსჯელეს“, – იტყობინება პრეზიდენტის პრესსამსახური.

ამავე ცნობით, ლაბორატორიაში, რომელიც ენდრიუ ვებერის მონაწილეობით აშშ–ის მთავრობის 100–მილიონიანი დაფინანსებით შარშან მარტში გაიხსნა, პირველი კვლევები უახლოეს მომავალში დაიწყება და იქ ამერიკელი სამხედრო მკვლევარები იმუშავებენ.

“როგორც საუბრისას ამერიკულმა მხარემ აღნიშნა, ეს ლაბორატორია არის საზოგადოებრივი ჯანდაცვის სისტემის ერთ-ერთი მთავარი ელემენტი, რომელიც მნიშვნელოვან შედეგს მოიტანს ეპიდემიოლოგიური ზედამხედველობის, ბიოლოგიური კვლევისა და სურსათის უვნებლობის მხრივ“, – იტყობინება პრეზიდენტის პრესსამსახური.

ბიოლოგიურ კვლევითი ობიექტი კახეთის გზატკეცილზე მთლიანობაში 8 000 კვადრატულ მეტრზე მდებარეობს, საიდანაც 2 500 კვადრატული მეტრი უშუალოდ ლაბორატორიებს უკავია. ამერიკულ–ქართული ლაბორატორია აქტიურად ითანამშრომლებს ტაილანდში ბანგკოკისა და კენიაში ნაირობის ანალოგიურ ლაბორატორიებთან. საზოგადოებრივი ჯანდაცვის გაუმჯობესების ფუნქციას კავკასიის რეგიონში თბილისში არსებული ეს ლაბორატორია იკისრებს. 

პრეზიდენტის სასახლეში 12 მარტს გამართულ შეხვედრას ასევე ესწრებოდნენ ამ ლაბორატორიის ხელმძღვანელი ანა ჟვანია და საგარეო საქმეთა მინისტრის მოადგილე სერგი კაპანაძე.