ცენტრალურ საარჩევნო კომისიას მოუწოდებენ რაც შეიძლება სწრაფად გამოაქვეყნოს შემაჯამებელი ოქმები, რათა არჩევნების შედეგებთან დაკავშირებით მანიპულაციებს არ ჰქონდეს ადგილი.

კოალიცია „ქართული ოცნება“ აცხადებს, რომ მან პროპორციული წესით სულ ცოტა 63% მიიღო და ასევე მინიმუმ 42 მაჟორიტარული ოლქი მოიგო.

კოალიციის საარჩევნო შტაბის ხელმძღვანელის დავით საგანელიძის განცხადებით,  ცესკო „ძალიან ნელა აქვეყნებს შედეგებს“.

„სამწუხაროდ ის მონაცემები, რომლებიც მათ [ცესკოს] აქვთ გამოქვეყნებული, ეყრდნობა იმ ოლქებს, იმ უბნებს ჯერ–ჯერობით, რომლებიც ჩვენთვის იყო ყველაზე მძიმე. ეს იყო სამცხე–ჯავახეთი და ქვემო ქართლი და შესაბამისად ის პატარა სხვაობა, რომელიც ასახულია ცესკოს მონაცემებზე სწორედ ამითაა გამოწვეული“, – განაცხადა საგანელიძემ.

„მე არა მგონია, რომ ეს იყოს შემთხვევითი“, – განაგრძო მან, „როგორც ჩანს ცესკომ გადაწყვიტა, რომ თავიდანვე მოსახლეობა შეაჩვიოს იმ აზრს, რომ „ქართულ ოცნებას“ და ნაციონალურ მოძრაობას შორის სხვაობა არ არის დიდი“.

ცესკომ პირველადი შედეგების გამოქვეყნება 2 ოქტომბერს დილის 4 საათიდან დაიწყო და დაგვიანების მიზეზად მის სერვერებზე შეტევა დაასახელა.

ცესკოს ბოლო მონაცემები 17:30 საათისთვის უბნების საერთო რაოდენობის 35.16%–ს ეყრდნობა. პირველადი წინასწარი მონაცემებით, „ქართული ოცნება“ 53.15%–ით ლიდერობს, ხოლო ნაციონალურ მოძრაობას  – 41.6% აქვს.

დავით საგანელიძემ განაცხადა, რომ შემაჯამებელი ოქმების 93%–ზე დაყრდნობით პროპორციული დათვლით კითხვის ნიშნის ქვეშ არ დგას კოალიციის მიერ მიღებული ხმების 63% და 42 მაჟორიტარულ ოლქში მისი კანდიდატების გამარჯვების საკითხი, თუმცა ორივე სისტემით ასევე არსებობს სადავო ხმები.

„თუ ჩვენთვის ყველაზე ოპტიმისტურ ვარიანტში დამთავრდა დავები“, საგანელიძის განცხადებით, ეს ნიშნავს იმას, რომ „ქართულ ოცნებას“ 150 წევრიან პარლამენტში ეყოლება 47 მაჟორიტარი, ხოლო პროპორციული სისტემით აიღებს ხმების 65% –ს, რაც „დაახლოებით 50 ადგილია“.

„ოპტიმისტური გათვლებით 97 ადგილი შეიძლება აიღოს „ქართულმა ოცნებამ“, პესიმისტური გათვლებით 90–91 ადგილი“, – განაცხადა მან.

იმავდროულად, ცესკოსთან არჩევნების მონაცემების ნელი ტემპებით გამოქვეყნების წინააღმდეგ აქცია გამართეს „ქართული ოცნების“ აქტივისტებმა.

ახალგაზრდა იურისტთა ასოციაციამ ასევე მოუწოდა ცესკოს მაქსიმალურად სწრაფად გამოაქვეყნოს შემაჯამებელი ოქმები, რათა თავიდან იქნას აცილებული სხვადასხვა სახის მანიპულაციები".

„პროცესი საკმაოდ ნელი ტემპით მიმდინარეობს“, – განაცხადა საიას ხელმძღვანელმა თამარ ჩუგოშვილმა.