ცესკოს განცხადებით, იმ შემთხვევაში თუ საპრეზიდენტო არჩევნების მეორე ტურში გასული ორი კანდიდატიდან ერთ-ერთი უარს იტყვის არჩევნებში მონაწილეობის გაგრძელებაზე, მან კენჭისყრის დღემდე არაუგვიანეს 10 დღით ადრე უნდა მიმართოს წერილობით ცესკოს კანდიდატურის მოსახსნელად.

„ასეთ შემთხვევაში მეორე ტურში გასული კანდიდატი საარჩევნო ბიულეტენში ვეღარ მოხვდება, სადაც დარჩება მხოლოდ მისი პოტენციური კონკურენტი, რომელიც იქნება მეორე ტურში მონაწილე ერთადერთი კანდიდატი და მისი გაპრეზიდენტებისთვის 1 ხმაც საკმარისი იქნება“, - განუცხადა ცესკოს პრესსპიკერმა ეკა აზარაშვილმა Civil.ge-ს 19 ოქტომბერს.

მისი თქმით, თუ მეორე ტურამდე 10 დღით ადრე კანდიდატი ოფიციალურად არ აცნობებს ცესკოს და მხოლოდ ზეპირად განაცხადებს იმის შესახებ, რომ კანდიდატურა მოხსნა, ის მაინც იქნება წარმოდგენილი კონკურენტ კანდიდატთან ერთად საარჩევნო ბიულეტენში და არჩევნები მიღებული ხმების საფუძველზე შეჯამდება, კერძოდ კი მოიგებს ის, ვინც ამ ორი კანდიდატიდან მეტ ხმას დააგროვებს.

ცესკოში ეს განმარტებები ქართული ოცნების პრეზიდენტობის კანდიდატის გიორგი მარგველაშვილის იმ განცხადების ფონზე გაკეთდა, რომ ის საპრეზიდენტო არჩევნების მეორე ტურის საჭიროების შემთხვევაში, აღარ გააგრძელებს ბრძოლას პრეზიდენტობისთვის და გამოეთიშება მარათონს.

კანონმდებლობის თანახმად,  27 ოქტომბრის საპრეზიდენტო არჩევნებში არჩეულად ჩაითვლება პრეზიდენტობის ის კანდიდატი, რომელიც არჩევნებში მონაწილეთა ამომრჩევლის ხმების ნახევარზე მეტს ანუ 50% პლიუს ერთ ხმას დააგროვებს. 

ცესკო ვალდებულია, რომ 27 ოქტომბრიდან მაქსიმუმ 25 დღეში შეაჯამოს და გამოაქვეყნოს არჩევნების შედეგები. 

თუ პირველ ტურში ვერცერთი კანდიდატი ვერ დააგროვებს ხმათა ნახევარზე მეტს, ინიშნება მეორე ტური, რომელიც არჩევნების პირველი ტურის შედეგების გამოცხადებიდან ორი კვირის თავზე იმართება. 

მეორე ტურში მონაწილეობის უფლება აქვს იმ ორ კანდიდატს, რომელთაც პირველ ტურში საუკეთესო შედეგი აჩვენეს. იმ შემთხვევაში, თუ პირველ ტურში უკეთესი შედეგების მქონე კანდიდატის შემდგომმა ორმა კანდიდატმა ხმათა თანაბარი რაოდენობა დააგროვა, მეორე ტურში მონაწილე მეორე კანდიდატი წილისყრით გამოვლინდება.

მეორე ტურში არჩეულად ჩაითვლება ის კანდიდატი, რომელიც მეტ ხმას მიიღებს, ხოლო თუ მათ თაბარი რაოდენობის ხმები დააგროვეს, გამარჯვებული გახდება ის კანდიდატი, რომელმაც პირველ ტურში მეტი ხმა მიიღო. 

საქართველოს კანონმდებლობა ასევე ითვალისწინებს ხელახალი არჩევნების გამართვას იმ შემთხვევაში, თუ არჩევნებში მონაწილე ყველა კანდიდატი პირველ ან მეორე ტურში მოხსნის თავის კანდიდატურას. ხელახალ არჩევნებს პარლამენტი არჩევნების შედეგების შეჯამებიდან 2 თვის ვადაში ნიშნავს.