საქართველოს საგარეო საქმეთა მინისტრმა მაია ფანჯიკიძემ 19 სექტემბერს გაეროს უშიშროების საბჭოს სხდომაზე, რომელიც ერაყის საკითხს მიეძღვნა, განაცხადა, რომ თბილისი მზად არის ისლამური სახელმწიფოს წინააღმდეგ საბრძოლველად საერთაშორისო ძალისხმევას შეუერთდეს და იმუშავებს პარტნიორებთან, რათა განსაზღვროს, თუ რა წვლილის შეტანა შეუძლია საქართველოს.

ფანჯიკიძემ საქართველოს საკმაოდ იშვიათი გამოჩენა გაეროს უშიშროების საბჭოზე იმისთვისაც გამოიყენა, რომ დაეგმო უკრაინის წინააღმდეგ რუსეთის „სამხედრო აგრესია“ და აფხაზეთისა და სამხრეთ ოსეთის „მიმდინარე ოკუპაცია“.

გაეროს უშიშროების საბჭოს სხდომა, რომელსაც  35 ქვეყნის წარმომადგენელი, მათ შორის საგარეო საქმეთა მინისტრები áƒ”სწრებოდნენ და აშშ–ის სახელმწიფო მდივანი ჯონ კერი თავმჯდომარეობდა, მიზნად ისახავდა ერაყის ახალი მთავრობის მხარდაჭერას და ისლამური სახელმწიფოს წინააღმდეგ მიმართულ ძალისხმევაზე მსჯელობას.

„ევროპის უსაფრთხოებას მნიშვნელოვან გამოწვევას უქმნის რუსეთის სამხედრო აგრესია უკრაინის წინააღმდეგ. საქართველომაც იზარალა 2008 წელს რუსეთის სამხედრო აგრესიის და მისი ორი რეგიონის მიმდინარე ოკუპაციის გამო“, – განაცხადა საქართველოს საგარეო საქმეთა მინისტრმა თავის გამოსვლაში, „საზღვრების ძალისმიერი გზით შეცვლის შემაშფოთებელი მაგალითი მნიშვნელოვან საფრთხეებს უქმნის მთლიანი, თავისუფალი და მშვიდობიანი ევროპის სტრატეგიულ ხედვას“.

ფანჯიკიძის თქმით, საქართველო „ღრმადაა შოკირებული და შეწუხებული ერაყში ძალადობრივი განვითარების და უსაფრთხოების კუთხით არსებული სიტუაციის სწრაფი გაუარესების გამო“.

„მზად ვართ ჰუმანიტარული დახმარება აღმოვუჩინოთ მათ, ვინც იზარალეს ტერორისტული ჯგუფების სასტიკი ქმედებების გამო. ამას გარდა, საქართველოს ღირებული გამოცდილება საბრძოლო მისიებიდან, ასევე წარმატებული ტრანსფორმაცია თავდაცვის სფეროში  შეიძლება ეფექტურად იქნას გამოყენებული ერაყის და სხვა უსაფრთხოების ძალების შესაძლებლობის გასაძლიერებლად იმ დროს, როდესაც ისინი ისლამური სახელმწიფოს ტერორისტებს ებრძვიან“, – განაცხადა საქართველოს საგარეო საქმეთა მინისტრმა.

„მოუთმენლად ველით ამერიკის შეერთებულ შტატებთან და კოალიციის სხვა პარტნიორებთან მუშაობას მომდევნო დღეებში და კვირებში, რათა განვსაზღვროთ ის სფეროები, რომელთაც საქართველოს წვლილი დამატებით ღირებულებას შესძენს“, – განაცხადა მან.

„მინდა ძლიერი მხარდაჭერა გამოვუცხადო ერაყის ახალ მთავრობას“, – განაცხადა ფანჯიკიძემ, „საქართველო უკიდურესად გმობს ტერორიზმის და ძალადობის ყველა სამარცხვინო აქტს“.

„ისლამური სახელმწიფო არა მხოლოდ ახლო აღმოსავლეთის ქვეყნებს უქმნის საფრთხეს, არამედ ევროპასაც, ჩრდილოეთ ამერიკასაც და იმის იქითაც. მხოლოდ ჩვენი ერთობლივი ძალისხმევითაა შესაძლებელი ასეთი ძალადობრივი ქმედებების შეჩერება და აღკვეთა“, – განაცხადა საქართველოს საგარეო საქმეთა მინისტრმა.

„საქართველო, როგორც სანდო მოკავშირე და უნარიანი პარტნიორი, მტკიცე  ძალისხმევას ახორციელებს, რათა უზრუნველყოს უსაფრთხოება და სტაბილურობა მსოფლიოს მასშტაბით“, – განაცხადა მან და აღნიშნა საქართველოს წარსული წვლილი ერაყში, სადაც დაახლოებით 2 000 ქართველი სამხედრო იყო განთავსებული 2008 წლის აგვისტომდე, და ასევე საქართველოს მიმდინარე კონტრიბუცია ISAF–ის ოპერაციაში ავღანეთში და ევროკავშირის მისიაში ცენტრალური აფრიკის რესპუბლიკაში.

„ჩვენი ერთგულება მსოფლიო მშვიდობის და სტაბილურობის მიმართ მტკიცეა. საქართველო სრულად უჭერს მხარს კოალიციის ძალისხმევას, რომ დაამარცხოს ისლამური სახელმწიფო და რეგიონში მშვიდობა დაამყაროს“, – განაცხადა მან.

აშშ–სახელმწიფო მდივანმა ჯონ კერიმ, რომელიც სხდომას უძღვებოდა, მადლობა გადაუხადა საქართველოს „ყველაფრისთვის, რასაც თქვენ აკეთებთ, მიუხედავად სხვა გამოწვევებისა, რომლის წინაშეც, როგორც ჩვენ ვიცით, თქვენ დგახართ“.