ემზარ კვიციანს 12 წლით თავისუფლების აღკვეთა მიესაჯა
Civil Georgia, Tbilisi / 17 Nov.'14 / 16:19

ემზარ კვიციანი ზუგდიდის სასამართლომ დამნაშავედ ცნო უკანონო გასამხედროებული ჯგუფის შექმნასა და 2006 წელს კოდორის ხეობაში ამბოხის მოწყობაში და მას 12 წლით თავისუფლების აღკვეთა მიუსაჯა.

კვიციანი, რომელიც ბრალდებებს უარყოფს, 2014 წლის თებერვალში მოსკოვიდან თბილისში დაბრუნებისას დააკავეს. პროკურატურამ განაცხადა, რომ კვიციანს მოუხდა საქართველოში დაბრუნება, რადგან რუსეთმა მისი „დეპორტაცია“ განახორციელა. კვიციანის ადვოკატმა განაცხადა, რომ განაჩენი ზემდგომ ინსტანციაში გასაჩივრდება.

2008 წლის აგვისტოს ომამდე, ზემო კოდორის ხეობა ერთადერთი ადგილი იყო სეპარატისტულ აფხაზეთში, რომელიც თბილისის კონტროლს ექვემდებარებოდა. გასამხედროებული ჯგუფი ”მონადირე”, რომლის მეთაურიც ემზარ კვიციანი იყო, მას შემდეგ შეიქმნა ადგილობრივი მოსახლეობის მონაწილეობით ხეობის დაცვის მიზნით, რაც 1992 წელს აფხაზეთში შეიარაღებული კონფლიქტი დაიწყო. ეს ჯგუფი განაგებდა ხეობას,  ხოლო ცენტრალური ხელისუფლების უფლებამოსილება კოდორის ხეობაზე მხოლოდ პირობითი იყო. თუმცა, ეს სიტუაცია 2006 წლის ზაფხულში შეიცვალა. კვიციანმა 2006 წლის 22 ივლისს ცენტრალურ ხელისუფლებას დაუმორჩილებლობა გამოუცხადა და ამის მიზეზად „მონადირის“ დაშლის გეგმები დაასახელა; საპასუხოდ, ხელისუფლებამ კოდორში სამხედრო ძალები გაგზავნა, რის შემდეგაც კვიციანი იძულებული გახდა ხეობიდან გაქცეულიყო.

Civil.Ge © 2001-2024