შინაგან საქმეთა მინისტრი უვიზო რეჟიმის დარღვევის პრევენციულ ზომებზე საუბრობს Civil Georgia, Tbilisi / 28 Mar.'17 / 14:32 27 მარტს სპეციალურ ბრიფინგზე საუბრისას შინაგან საქმეთა მინისტრმა გიორგი მღებრიშვილმა განაცხადა, რომ ქართველი მესაზღვრეები „დეტალურად“ გაესაუბრებიან იმ მოქალაქეებს, რომლებიც შენგენის ქვეყნებში მიემგზავრებიან, რათა თავიდან იქნას აცილებული ე.წ. „შეჩერების მექანიზმის“ ამოქმედება, რომელიც დროებით შეაჩერებს უვიზო რეჟიმს იმ შემთხვევაში, თუ ქართველები სისტემის ბოროტად გამოყენებას შეეცდებიან. მღებრიშვილმა განმარტა, რომ მესაზღვრეები მოქალაქეებს კონსულტაციას გაუწევენ უვიზო მიმოსვლის პირობებთან დაკავშირებით და შეამოწმებენ მათი სამგზავრო დოკუმენტების შესაბამისობას შენგენის მოთხოვნებთან. „იმ შემთხვევაში, თუ ამგვარი შემოწმებისას და გასაუბრებისას გამოვლინდება, რომ რომელიმე დოკუმენტი არ შეესაბამება შენგენის ზონაში საზღვრის კვეთისთვის საჭირო სტანდარტებს, რაც თავისთავად გულისხმობს იმას, რომ აღნიშნული პირს, მაღალი ალბათობით, არ შეუშვებენ ევროკავშირში, მესაზღვრე-კონტროლიორი ამის თაობაზე მას წინასწარ გააფრთხილებს და მოსალოდნელ შედეგებსაც განუმარტავს“, - განაცხადა მღებრიშვილმა.      შინაგან საქმეთა მინისტრმა ასევე განაცხადა, რომ სპეციალური პროგრამა შემუშავდა იმისათვის, რომ „საქართველოს ყოველი მოქალაქე, რომელიც უვიზო რეჟიმით გათვალისწინებულ პირობებს დაარღვევს, სწრაფად და ეფექტურად გამოვავლინოთ და ჩვენს ევროპელ კოლეგებს ინფორმაცია პროაქტიულად მივაწოდოთ“. მღებრიშვილის თქმით, ბოლო ექვსი წლის áƒ’ანმავლობაში საქართველომ რეადმისიის 7 300 განაცხადი მიიღო ევროკავშირის წევრი ქვეყნებიდან, საიდანაც 95% დაკმაყოფილდა.  „ეს მოწმობს მჭიდრო თანამშრომლობას ევროკავშირის ქვეყნების სამართალდამცავ ორგანოებთან, როგორც ორმხრივი ხელშეკრულებების, ასევე, პოლიციის ატაშეების დონეზე“. ბრიფინგზე მღებრიშვილმა ასევე აღნიშნა, რომ შინაგან საქმეთა სამინისტრო და ევროპოლი 4 აპრილს თანამშრომლობის თაობაზე შეთანხმებას მოაწერენ ხელს, რაც ნიშნავს, რომ საქართველო გახდება „ევროკავშირის ნაწილი სამართალდაცვით სფეროში, რაც არის მნიშვნელოვანი წინგადადგმული ნაბიჯი საქართველოს ევროინტეგრაციის გზაზე“. ცხრათვიან შეჩერების მექანიზმს, მისი შემდგომი გაგრძელების შესაძლებლობით, ევროკავშირი „შესაბამისი და ობიექტური მონაცემების“ საფუძველზე იმ შემთხვევაში აამოქმედებს, თუ მესამე ქვეყნებიდან გაიზრდება არალეგალების რაოდენობა, თავშესაფრის თაობაზე დაუსაბუთებელი განაცხადები, ქვეყანა არ უზრუნველყოფს ევროკავშირში არალეგალურად მყოფი მისი მოქალაქეების დაბრუნებას ან ეს მოქალაქეები პრობლემებს შეუქმნიან შიდა უსაფრთხოებას. შეჩერების მექანიზმი ვიზალიბერალიზაციის რეგულაციასთან ერთად მიიღეს.

Civil.Ge © 2001-2025