ერედვში მიმდინარე „გაწმენდითი“ სამუშაოების შესახებ ცნობილი გახდა ადგილობრივი ტელევიზიის სიუჟეტიდან, რომელიც 15 სექტემბერს გადაიცა. 

ერედვი, რომელიც 2008 წლის აგვისტოს ომის შემდეგ რუსეთის მიერაა ოკუპირებული, სულ 268 სახლისგან უნდა გაიწმინდოს. ამათგან 163-ის მიწისზედა ნაგებობა უკვე მოსწორებულია. სამუშაოები, რომელიც რუსეთის მიერ დაფინანსებული „სამხრეთ ოსეთის სოციო-ეკონომიკური განვითარების საინვესტიციო პროგრამის“ ფარგლებში ხორციელდება, ოქტომბრის ბოლოს უნდა დასრულდეს, გამოთავისუფლებული მიწები კი - რეგიონის „სოფლის მეურნეობის სამინისტროს“ გადაეცემა. 

2008 წლის რუსეთ-საქართველოს ომამდე სოფელ ერედვში 1000-მდე მოსახლე ცხოვრობდა. 

ერედვში მიმდინარე პროცესის შესახებ განცხადებები საქართველოს პრეზიდენტმა, პარლამენტის თავმჯდომარემ და მინისტრებმა გააკეთეს. ისინი ეთნიკური წმენდის გაგრძელებაზე, ანექსიაზე და საერთაშორისო საზოგადოების ჩართულობის აუცილებლობაზე საუბრობენ. 

პრეზიდენტ მარგველაშვილის მიერ 22 სექტემბერს გავრცელებულ განცხადებაში ნათქვამია, რომ ოკუპირებულ სოფელ ერედვში დევნილი მოსახლეობის სახლების ნგრევა „მიზნად ისახავს ქართული მოსახლეობის კვალის ამოშლას საქართველოს ამ ძირძველი ტერიტორიიდან“. 

„ოკუპირებულ ტერიტორიაზე, სადაც განხორციელდა ეთნიკური წმენდა, საოკუპაციო ძალა ახორციელებს მორიგ ვანდალურ ქმედებებს, რომლებიც მიმართულია როგორც საქართველოს ტერიტორიული მთლიანობის, ასევე ადამიანის ფუნდამენტური უფლებების წინააღმდეგ“, - აცხადებს პრეზიდენტი.  

მარგველაშვილი ოკუპირებული რეგიონის ხელისუფლების ქმედებებს აფასებს „ეთნიკური წმენდის პოლიტიკის გაგრძელებად“ და „ანექსიისკენ მიმართულ“ ნაბიჯებად, „რომელსაც საერთაშორისო საზოგადოებამ უმკაცრესი შეფასება უნდა მისცეს“.

დღესვე, საკითხის თაობაზე კომენტარი პარლამენტის თავმჯდომარემ, ირაკლი კობახიძემაც, გააკეთა და ქართველების სახლების განადგურებას „აგრესიული პოლიტიკის სამწუხარო ტენდენცია“ უწოდა. მან ასევე აღნიშნა, რომ ხელისუფლება საერთაშორისო პარტნიორებთან მუდმივად საუბრობს ოკუპირებულ ტერიტორიებზე შექმნილი ვითარების შესახებ. 

სოფელ ერედვში მიმდინარე გაწმენდით სამუშაოებს „მიუღებელს“ უწოდებს შერიგებისა და სამოქალაქო თანასწორობის საკითხებში სახელმწიფო მინისტრი, ქეთევან ციხელაშვილი.

„ეს არ არის ნანგრევების სამშენებლო მასალა, ეს არის სახლები ცოცხალი, კონკრეტული ადამიანების, რომლებიც დღეს გამოდევნილი არიან საკუთარი სოფლებიდან და ვერ ახერხებენ დაბრუნებას სწორედ იმ განგრძობადი საოკუპაციო პოლიტიკის გამო და იმ მიზანმიმართული ხელისშეშლის პოლიტიკის გამო, რომელსაც ახორციელებს რუსეთი და სამწუხაროდ დე ფაქტო ხელისუფლებებიც“, - განუცხადა ტელეკომპანია „იმედს“ ქეთევან ციხელაშვილმა. 

სოფელ ერედვში განვითარებულ მოვლენებზე კომენტარი ნიუ-იორკში გაეროს გენერალურ ასამბლეაზე მყოფმა საქართველოს საგარეო საქმეთა მინისტრმაც გააკეთა. 

მიხეილ ჯანელიძე ერედვში მიმდინარე სამუშაოებს „გენოციდის გაგრძელებად“ მიიჩნევს. 

„ქართული დიპლომატია მიმართულია იმისკენ, რომ საერთაშორისო ჩართულობით შევძლოთ ამ ძალიან რთული პრობლემის გადაჭრა“, - განაცხადა საგარეო საქმეთა მინისტრმა.