მთავრობა იძულებით გადადგა
/ 1 Nov.'01 / 20:13

პრეზიდენტი შევარდნაძე იძულებული გახდა მთავრობა დაეთხოვა. პრეზიდენტის გადაწყვეტილება შინაგან საქმეთა მინისტრის მიერ გადადგომის შესახებ გაკეთებულ განცხადებას მოჰყვა. თარგამაძის ეს ნაბიჯი, თავის მხრივ, დეპუტატებისა და პარლამენტის წინ შეკრებილი მრავალათასიანი დემონსტრაციის ზეწოლის შედეგი იყო.

პარლამენტის თავმჯდომარემ ზურაბ ჟვანიამ გააკეთა განცხადება, რომელმაც, შეიძლება ითქვას, შემდგომ განვითარებულ მოვლენებზე გადამწყვეტი მნიშვნელობა იქონია. მან მიტინგზე სიტყვით გამოსვლისას განაცხადა, რომ მზად იყო გადამდგარიყო როგორც კი შინაგან საქმეთა მინისტრი დატოვებდა თანამდებობას.

"სიტუაციიდან ერთადერთი გამოსავალი თარგამაძის გადადგომა და ვადამდელი საპარლამენტო არჩევნების ჩატარეებაა. ამის შემდეგ მეც მზად ვარ გადავდგე", განაცხადა პარლამენტის თავჯდომარემ. 

დეპუტატებმა, მათი განსხვავებული პოლიტიკური შეხედულებების მიუხედავად, ერთსულოვნად დაუჭირეს მხარი ჟვანიას ინიციატივას და თარგამძეს თანამდებობის დატოვებისაკენ მოუწოდეს.

ამის შემდეგ შინაგან საქმეთა მინისტრი იძულებული გახდა დაყოლოდა დეპუტატებისა და მოსახლეობის მოთხოვნას. მან თავისი გადაწყვეტილება პარლამენტის რიგგარშე სხდომაზე გააკეთა.

მოვლენები საკმაოდ სწრაფად განვითარდა. 1 ნოემბერს, 11 სთ-ზე პარლამენტის რიგგარეშე სხდომა დაიწყო, რომლეზეც ერთადერთ საკითხზე - სიტყვის თავისუფლების წინააღმდეგ მიმართული ქმედებებზე უნდა ემსჯელათ.

ამის პარალელურად, პარლამენტის შენობის წინ თავს იყრიდა მოსახლეობა. რუსთაველის მოედანზე 5 000-ზე მეტი ადამიანი მივიდა. ისინი შინაგან საქმეთა მინისტრთან ერთად პრეზიდენტის გადადგომასაც მოითხოვდნენ.

თარგამაძის ამ გადაწყვეტილების შემდეგ ზურაბ ჟვანიამ დეპუტატებს პრეზიდენტის გადაწყვეტილება გააცნო, რომელიც აღმასრულებელი ხელისუფლების მთელი შემადგენლობის დათხოვნას ეხებოდა. მოვალეობის შემსრულებლებად მინისტრების პირველი მოადგილეები დაინიშნენ.

შინაგან საქმეთა მინსტრს გენერალურმა პროკურორმაც მიბაძა და გადადგომის შესახებ პარლამენტის რიგგარშე სხდომაზე განცხადება გააკეთა.

პარლამენტის წინ შეკრებილი მოსახლეობა აღფრთოვანებით შეხვდა მთავრობის დათხოვნის ფაქტს. მომიტინგეებს შუადღისას მიხეილ სააკაშვილიც შეუერთდა. მან ხალხს განუცხადა, რომ დღეს მიღებული განდაწყვეტილებები არის მოსახლეობის პირველი გამარჯვება კორუმპირებულ მთავრობაზე. 

Civil.Ge © 2001-2024