ქვემოთ მოცემულია "სამართლიანი არჩევნების" მიერ 3 ნოემბერს გამოქვეყნებული ხმების პარალელური დათვლის შედეგები:

სააკაშვილი-ნაციონალური მოძრაობა - 26,6%
ახალი საქართველოსთვის - 18,92%
ლეიბორისტული პარტია - 17,3%
ბურჯანაძე-დემოკრატები - 10,15%
აღორძინების კავშირი - 8,13%
ახალი მემარჯვენეები - 7,99%
მრეწველობა გადაარჩენს საქართველოს - 5,2%

"სამართლიანი არჩევნების" განცხადებით, პარალელური ხმების დათვლის შედეგებში ცდომილების ზღვარი 2% არ გადააჭარბებს.

"სამართლიანი არჩევნების" დამკვირვებლებმა ხმები საუბნო საარჩევნო კომისიების ოფიციალურ წარმომადგენლებთან ერთად დათვალეს. ხმების პარალელური დათვლა ერთ-ერთ მეთოდს წარმოადგენს არჩევნების შედეგების გაყალბების თავიდან ასაცილებლად.

ცენტრალური საარჩევნო კომისიის (ცსკო) წინასწარი მონაცემებით, არჩევნებში სახელისუფლებო ბლოკი "ახალი საქართველოსთვის" ლიდერობს.

ცსკო-მ ხმები 2,870 საარჩევნო უბნიდან 450 უბანში დათვალა. ხმები უბნებზე შემდეგნაირად განაწილდა: ახალი საქართველოსთვის - 27,6%; ნაციონალური მოძრაობა - 23%; ლეიბორისტული პარტია - 16,1%; ბურჯანაძე-დემოკრატები - 9,6%; ახალი მემარჯვენეები - 8,7%; მრეწველები - 5,9% და აღორძინება - 5%.

ეს საბოლოო შედეგი არ არის, რადგანაც ცსკო-ს კიდევ 2,420 უბანში დარჩა დასათვლელი ხმები.

პარლამენტში შესვლა მხოლოდ იმ პარტიებს შეეძლებათ, რომლებიც 7%-იან ბარიერს გადალახავენ.