პრეზიდენტი სააკაშვილი 28 მარტს ოპოზიციონერ დეპუტატებს შეხვდა და სამხრეთ ოსეთში ”დროებითი ადმინისტრაციული ერთეულის” შექმნის შესახებ თბილისის გეგმები განიხილა.

პრეზიდენტმა განუცხადა კანონმდებლებს, რომ ”თავის დროზე კონფლიქტთან დაკაშირებით შეცდომები ყველა მხარემ დაუშვა, მათ შორის საკანონმდებლო შეცდომები ჩვენც დავუშვით”.

”მაგრამ ყოველთვის შეიძლება ამ შეცდომების გამოსწორება”, - დასძინა მან.

სააკაშვილს ”შეცდომებზე” დეტალურად არ უსაუბრია, თუმცა, სავარაუდოდ იგი მიანიშნებდა საქართველოს საკანონმდებლო ორგანოს გადაწყვეტილებაზე სამხრეთ ოსეთის ავტონომიური ოლქის სტატუსის გაუქმების თაობაზე. ეს გადაწყვეტილება რეგიონში 90-იანი წლების დასაწყისში კონფლიქტის გაჩაღებამდე იქნა მიღებული.

შეხვედრაში მონაწილეობდნენ ახალი მემარჯვენეების ლიდერი დავით გამყრელიძე, რესპუბლიკური პარტიის ლიდერი დავით უსუფაშვილი, კონსერვატიული პარტიის ლიდერი ზვიად ძიძიგური და მრეწველთა პარტიის ლიდერი ზურაბ ტყემალაძე.  შეხვედრას ასევე ესწრებოდნენ დეპუტატები გიგა ბოკერია ნაციონალური მოძრაობიდან და საპარლამენტო უმრავლესობის ლიდერი მაია ნადირაძე.

შეხვედრას ასევე ესწრებოდნენ საგარეო საქმეთა მინისტრი გელა ბეჟუაშვილი და კონფლიქტების მოგვარების საკითხებში სახელმწიფო მინისტრი მერაბ ანთაძე.

სააკაშვილმა განუცხადა დეპუტატებს, რომ სამხრეთ ოსეთში ადმინისტრაციული ერთეულის შექმნაზე თბილისის ინიციატივა მიზნად ისახავს იმ ”პროვოკაციების” თავიდან აცილებას, რომელთა გზითაც იგეგმება ”საქართველოს დაქუცმაცება, რასაც ჩვენ ვუპასუხებთ ენერგიული ქმედებებით და ინიციატივებით”.       

”თქვენი[ოპოზიციონერი ლიდერების] აზრი ჩვენთვის ძალზე მნიშვნელოვანია, თუნდაც ის ჩვენს პოზიციას ყველა დეტალში არ ემთხვეოდეს”, - განაცხადა სააკაშვილმა.

შეხვედრის შემდეგ ოპოზიციონერმა დეპუტატებმა უარი თქვეს კომენტარის გაკეთებაზე, თუმცა აღნიშნეს, რომ ინიციატივა სამხრეთ ოსეთის ადმინისტრაციული ერთეულის შექმნაზე ”საინტერესოა”.