საქართველოს პარლამენტმა 28 მარტს რატიფიცირება გაუკეთა ბაქო-თბილისი-ყარსის ახალი სარკინიგზო ხაზის შესახებ შეთანხმებას და ასევე ამ პროექტის განხორციელების მიზნით საქართველოსა და აზერბაიჯანს შორის დადებულ სასესხო ხელშეკრულებას.

სარკინიგზო შეთანხმებას ქართულმა, თურქულმა და აზერბაიჯანულმა მხარეებმა თბილისში 7 თებერვალს მოაწერეს ხელი. პროექტის მიზანია ტრანსევროპული და ტრანსაზიური სარკინიგზო დერეფნების შეერთების უზრუნველყოფა.

7 თებერვალსვე გაფორმდა საქართველოსა და აზერბაიჯანს შორის სასესხო შეთანხმება რეგიონული რკინიგზის მშენებლობა-რეაბილიტაციის მიზნით საქართველოსთვის 200 მლნ აშშ დოლარის ოდენობით 25 წლიანი სესხის გამოყოფის თაობაზე. სესხის დაფარვას საქართველო რკინიგზის ამოქმედებიდან მიღებული შემოსავლებით გეგმავს.