რუსეთის პრეზიდენტმა ვლადიმერ პუტინმა 14 ივლისს გამოსცა ბრძანებულება, რომლის თანახმადაც რუსეთმა შეაჩერა  ევროპაში ჩვეულებრივი შეიარაღებული ძალების შესახებ (CFE) 1990 წელს ხელმოწერილი ხელშეკრულების და მისგან გამომდინარე შეთანხმებების მოქმედება.

რუსეთის პრეზიდენტის ვებ-გვერდზე გამოქვეყნებულ ბრანებულებაში ამ გადაწყვეტილების მოტივად დასახელებულია ”დაუყოვნებლივი ზომების მიღების საჭიროება”, რაც რუსეთის ფედერაციის ინტერესებიდან გამომდინარეობს.

ბრძანებულების განმარტებით ბარათში ნათქვამია, რომ აღნიშნული გადაწყვეტილება იმოქმედებს მანამ, სანამ CFE-ის ხელმომწერი სახელმწიფოები არ მოახდენენ მის რატიფიცირებას.

ვლადიმერ პუტინმა ჯერ კიდევ აპრილში გააკეთა განცხადება CFE-ზე მარატორიუმის გამოცხადების განზრახვის შესახებ.

12-15 ივნისს ნატო-რუსეთის ფორმატში ვენაში ამ საკითხზე გაიმართა კონფერენცია, რომელმაც მოსკოვის განცხადებით, ”აჩვენა, რომ ალიანსის წევრი ქვეყნები კვლავაც აგრძელებენ ადაპტირებული ხელშეკრულების რატიფიკაციის დაწყების დაკავშირებას რუსეთის მიერ სტამბოლის შეთანხმებების შესრულებასთან”.

ე.წ სტამბოლის შეთანხმებების ფარგლებში რუსეთმა აიღო ვალდებულება საქართველოდან და მოლდოვადან საკუთარი ბაზების გაყვანის თაობაზე. ნატოს წევრი ქვეყნების მიერ ხელშეკრულების რატიფიცირების გაჭიანურების ერთ-ერთი მიზეზი ის არის, რომ რუსეთს სრულად არ შეუსრულებია ეს ვალდებულებები, რომელიც 1999 წლის ნოემბერს სტამბოლში ხელმოწერილი ადაპტირებული CFE -ს შემადგენელი ნაწილია. თუმცა რუსეთის უარყოფს ამას და აცხადებს, რომ ბაზების გაყვანა საქართველოსთან და მოლდოვასთან მიღწეული ორმხრივი შეთანხმებების საგანია.

რუსეთმა საქართველოდან ვაზიანის სამხედრო ბაზა 2001 წლის ივლისში დაცალა და ასევე განაცხადა, რომ გუდაუთის ბაზაც გაიყვანა. თუმცა თბილისი დღემდე მოითხოვს საერთაშორისო მონიტორინგის ჩატარებას, რომელიც დაადასტურებს აფხაზეთში რუსული ბაზის დახურვის ფაქტს.

რუსული სამხედრო პერსონალისა და ტექნიკის გაყვანის მეორე ეტაპი ახალქალაქისა და ბათუმის სამხედრო ბაზებიდან 2006 წლის მარტის შეთანხმების საფუძველზე დაიწყო. ახალქალაქის ბაზა 2007 წლის ივნისში დაიხურა, ხოლო ბათუმის ბაზის გაყვანა 2008 წლის განმავლობაში  დასრულდება.