საქართველოში აშშ-ს საელჩოს წინ გამართულ საპროტესტო აქციაზე ხალხის პარტიის ლიდერმა კობა დავითაშვილმა გააპროტესტა აშშ-ს მთავრობის პოზიცია საქართველოში ჩატარებულ საპრეზიდენტო არჩევნებთან დაკავშირებით, რადგან ”მათ თვალი დახუჭეს უამრავ სიყალბეზე, ძალადობაზე, რომელიც მოხდა არჩევნების დღეს”.

”რომ არა ამერიკის შეერთებული შტატების მთავრობის სერიოზული მხარდაჭერა, ამ ქვეყანაში ფალსიფიკაცია, სიყალბე და ძალადობა ვერ გაიმარჯვებდა. ეს არის სიმართლე და ჩვენ ეს სიმართლე ყველამ კარგად ვიცით,”- განაცხადა დავითაშვილმა.

დავითაშვილი ცხრა ოპოზიციური პარტიის კოალიციის ერთ-ერთი ლიდერია, თუმცა დღევანდელი აქცია აშშ-ს საელჩოს წინ მისმა ხალხის პარტიამ დამოუკიდებლად მოაწყო. აქციაზე ასობით  საქართველოს მოქალაქე შეიკრიბა.

დავითაშვილის განცხადებით, აქციის მიზანი იყო მათი შეხედულებების შესახებ ამერიკის საზოგადოების ინფორმირება. თუმცა მან ასევე აღნიშნა, რომ საქართველოსა და აშშ-ს მეგობრობის საწინააღმდეგო არაფერი აქვს.