დსთ-ის ფორმატში სააკაშვილი-პუტინის 21 თებერვლის შეხვედრა მორიგ პრობლემად მოევლინა საქართველოს აფხაზეთის მიმართ დაწესებული სანქციების მოხსნის თაობაზე რუსეთის გადაწყვეტილებით, მიუხედავად იმისა, რომ ეს შეხვედრა სააკაშვილის ხელისუფლებამ საზოგადოებას მიაწოდა, როგორც ”გარღვევა ორმხრივ ურთიერთობებში”, ნათქვამია რესპუბლიკური პარტიის მიერ დღეს გავრცელებულ განცხადებაში.

რესპუბლიკელები აცხადებენ, რომ მათთვის მიულოდნელი არ ყოფილა რუსეთის გადაწყვეტილება, რომელიც 1996 წელს დსთ-ს მიერ დაწესებულ სანქციებს შერჩევით იყენებდა ზეწოლისთვის ხან თბილისზე და ხანაც სოხუმზე.

”უცნაური ისაა, რომ საქართველოს ხელისუფლებას არ მოაფიქრდა, თავად გამოსულიყო ინიციატივით სანქციების რეჟიმის შემსუბუქების თაობაზე, რაც სხვადასხვა მხარის მიერ კეთილი ნებისა და დადებითი პოლიტიკური ქვეტექსტის შემცველ პოლიტიკურ ნაბიჯად აღიქმებოდა და რუსეთის მხრიდან აღნიშნული ნაბიჯის პრევენციაც იქნებოდა,”- ნათქვამია განცხადებაში.

იმავდროულად, რესპუბლიკური პარტია აფრთხილებს საქართველოს ხელისუფლებას შესაძლო ”უპასუხისმგებლო ქმედების” წინააღმდეგ, რაც აფხაზეთის კონფლიქტის ირგვლივ ”ვითარების ესკალაციაში ჩაყოლაში” შეიძლება გამოიხატოს ”საკუთარი ძალაუფლების გადარჩენის” მიზნით.

”ფასი კი ამგვარი უპასუხისმგებლო ქმედებისა მას [ხელისუფლებას] ნაკლებად აღელვებს, რაც ახალი არასახარბიელო რეალიების გათვალისწინებით შეიძლება ძალიან ძვირი დაუჯდეს ქვეყანას,”- აცხადებს რესპუბლიკური პარტია.