Civil.ge-ს შესახებ
Eng | ქარ | Рус
ბოლო განახლება: 11:10 - 28 აპრ.'18
RSS
Mobile
Twitter
Facebook
სააკაშვილი ოპოზიციას საპროტესტო აქციის წინ ერთიანობისკენ მოუწოდებს
/ 8 მარ.'08 / 17:19
სივილ ჯორჯია

ოპოზიციის მიერ დაგეგმილ საპროტესტო აქციამდე ერთი დღით ადრე პრეზიდენტმა სააკაშვილმა ოპოზიციას გარე საფრთხეების წინააღმდეგ გაერთიანებისკენ მოუწოდა.

პრეზიდენტმა სააკაშვილმა 8 მარტს ოპოზიციას მოუწოდა ითანამშრომლოს ხელისუფლებასთან და პირადად მასთან, რუსეთის მიერ აფხაზეთის წინააღმდეგ ეკონომიკური სანქციების მოხსნის თაობაზე ”პროვოკაციული და საშიში” გადაწყვეტილების ფონზე.

”ეს არის ის მომენტი, როცა ყველა სხვა რაღაცა უნდა გადადიოდეს უკანა პლანზე,” - განაცხადა სააკაშვილმა თავის სატელევიზიო გამოსვლაში. ” მე მინდა ვუთხრა ოპოზიციას: ჩვენ ბევრ რაღაცაში უნდა ვკამათობდეთ - ოპოზიცია მნიშვნელოვანი ნაწილია დემოკრატიული მექანიზმის - უმეტეს შემთხვევაში შეიძლება არ ვთანხმდებოდეთ, მაგრამ არის საკითხები, რომლებზეც არ შეიძლება, რომ არ ვთანხმდებოდეთ. მე მინდა მოვუწოდო მათ დასხდნენ ჩემთან ერთად, ჩვენთან ერთად, საქართველოს მთავრობასთან ერთად და გამოვიმუშავოთ ჩვენი ერთობლივი პასუხი, ჩვენი ერთობლივი პოზიცია რუსეთის ამ პროვოკაციულ, საშიშ ქმედებასთან დაკავშირებით”. 

ყველა ძირითად ოპოზიციურ პარტიას ადრე მრავალჯერ უთქვამს, რომ ისინი არ ცნობენ სააკაშვილს ლეგიტიმურ პრეზიდენტად 5 იანვარს საპრეზიდენტო არჩევნების გაყალბების გამო და მასთან თანამშრომლობაზე უარს აცხადებენ. ამის გამო ოპოზიციურმა პარტიებმა დიალოგი აწარმოეს პარლამენტის თავმჯდომარესთან ნინო ბურჯანაძესთან.

5 მარტს რვა პარტიისგან შემდგარმა ოპოზიციურმა კოალიციამ განაცხადა, რომ 9 მარტიდან ხელახალი საპრეზიდენტო არჩევნების მოთხოვნით საპროტესტო აქციების დაწყებას გეგმავს. რვა ოპოზიციური პარტიის კოალიციამ 5 იანვრის საპრეზიდენტო არჩევნებთან დაკავშირებით გამოქვეყნებული ეუთოს საბოლოო დასკვნის საფუძველზე მოითხოვა ხელახალი საპრეზიდენტო არჩევნების ჩატარება. ოპოზიციის თქმით, ამ საკითხთან ერთად, ისინი ასევე მოითხოვენ ხელისუფლებისგან 29 იანვარს გამოქვეყნებულ მემორანდუმში გახმოვანებული მოთხოვნების შესრულებას.

რესპუბლიკურმა პარტიამ, რომელმაც ახლახანს დატოვა ოპოზიციური კოალიცია, განაცხადა, რომ შეუერთდება ოპოზიციის აქციას. თუმცა, პარტიამ აღნიშნა, რომ ხელახალი საპრეზიდენტო არჩევნების ჩატარების წინააღმდეგია იყო, რადგანაც მთავარი მიზანი უნდა იყოს თავისუფალი და სამართლიანი საპარლამენტო არჩევნების ჩატარება, რომლის დროსაც ოპოზიცია შეძლებს უმრავლესობის მოპოვებას ახალ პარლამენტში და შემდეგ გააუქმებს საპრეზიდენტო მმართველობას. ”9 მარტს დაგეგმილ საპროტესტო აქციაზე საპრეზიდენტო არჩევნების ხელახლა ჩატარების გარდა, სხვა მოწოდებაც არის და ეს არის საპარლამენტო არჩევნების სამართლიანად ჩატარება, ამ მოთხოვნით ჩვენ ყველა აქციაში მივიღებთ მონაწილეობას,” - განუცხადა Civil.Ge-ს თინა ხიდაშელმა რესპუბლიკური პარტიიდან.

ახალმა მემარჯვენეებმა დღეს განაცხადეს, რომ ჯერ არ მიუღიათ გადაწყვეტილება აქციაში მონაწილეობის თაობაზე, ხოლო ლეიბორისტული პარტია არ აპირებს აქციაში მონაწილეობას.   

9 მარტს პარლამენტის წინ დაგეგმილი საპროტესტო აქცია ერთგვარი გამოცდა იქნება ოპოზიციური კოალიციისთვის, რომელმაც ორი კვირის წინ მიიღო გადაწყვეტილება შეეწყვიტა საპროტესტო აქცია და შიმშილობა. ამ გადაწყვეტილებას ოპოზიციის ბევრი მხარდამჭერის მწვავე რეაქცია მოყვა და თავად კოალიციაში უთანხმოების მიზეზი გახდა. გადაწყვეტილებას მხარი დაუჭირა რესპუბლიკურმა პარტიამ - მაშინ ჯერ კიდევ კოალიციის წევრმა - თუმცა სხვა წევრებმა მწვავედ გააკრიტიკეს. 9 მარტის საპროტესტო აქციაზე გამოჩნდება, თუ რა შედეგი იქონია ამ საკამათო გადაწყვეტილებამ და რესპუბლიკური პარტიის კოალიციიდან გასვლამ ოპოზიციის კამპანიაზე და კარგავს თუ არა ის მუხტს.

თავდაცვის ყოფილმა მინისტრმა ირაკლი ოქრუაშვილმა, რომლის პარტია მოძრაობა ერთიანი საქართველოსთვის ასევე კოალიციის ნაწილია, გასულ კვირას გააკრიტიკა კოალიცია იმის გამო, რომ უფრო რადიკალური პოზიცია არ დაიკავა და ხელიდან გაუშვა ხელისუფლებაზე ზეწოლის მომენტი.

”მოსახლეობაში არსებული განწყობა ოპოზიციისგან რადიკალურ და მწვავე ქმედებებს მოითხოვდა. მათ [ოპოზიციამ] ეს ვერ შეამჩნია. ბუნებრივია, რომ არის იმედგაცრუების ნიშნები [ოპოზიციის მხარდამჭერებს შორის] და ახლა ოპოზიციამ როგორღაც რეაგირება უნდა მოახდინოს ამ იმედგაცრუებაზე,”- განაცხადა მან ტელეკომპანია ”კავკასიასთან” ინტერვიუში. ინტერვიუ ოთხი დღით ადრე ჩაიწერა, სანამ ოპოზიციური კოალიცია გამოაცხადებდა, რომ 9 მარტს საპროტესტო აქციების განახლებას გეგმავს.

ამავე თემაზე
უახლესი ამბები
28 აპრ.'18 11:10
ვანის და ხონის საარჩევნო ოლქში შუალედური საპარლამენტო არჩევნები მიმდინარეობს
ერთმანდატიან საარჩევნო ოლქში არჩევნებში ხუთი პარტიის და ერთი საინიციატივო ჯგუფის წარმომადგენელები მონაწილეობენ.
27 აპრ.'18 18:49
ქართველი პოლიტიკოსები ბიძინა ივანიშვილის პარტიაში დაბრუნებას აფასებენ
ბიძინა ივანიშვილს ქართული ოცნების თავმჯდომარედ პარტიის ყრილობაზე აირჩევენ, რომელიც უახლოეს პერიოდში შედგება.
27 აპრ.'18 18:09
აშშ-ის სახელმწიფო მდივნის თანაშემწე საქართველოს ესტუმრება
ვეს მიტჩელი ხელისუფლების წარმომადგენლებს შეხვდება და ნატო-საქართველოს სახალხო დიპლომატიის ფორუმზე გამოვა სიტყვით.
26 აპრ.'18 19:07
სტოლტენბერგი: საქართველო ნატოს ‘ძალიან ახლო’ პარტნიორია
ნატოს გენერალური მდივნის თქმით, საგარეო საქმეთა მინისტრების შეხვედრა ქვეყნის პროგრესს აღიარებს.
26 აპრ.'18 16:47
ყოფილი პრემიერ-მინისტრი ბიძინა ივანიშვილი ქართული ოცნების თავმჯდომარე გახდება
პრემიერ კვირიკაშვილის თქმით, ივანიშვილს შესწევს ძალა გააძლიეროს პოლიტიკური პარტია და მას „ახალი დინამიკა“ შესძინოს.
25 აპრ.'18 18:33
ხაჯიმბამ მთავრობის ახალი ხელმძღვანელი დანიშნა
გენადი გაგულიას ორჯერ ეკავა ოკუპირებული რეგიონის პრემიერ-მინისტრის თანამდებობა.
25 აპრ.'18 15:17
საქართველოს რეიტინგი პრესის თავისუფლების ინდექსში გაუმჯობესდა
საქართველოს პოსტ-საბჭოთა ქვეყნებიდან, ბალტიისპირეთის ქვეყნების გარდა, არცერთი ქვეყანა არ უსწრებს.
25 აპრ.'18 14:18
გახარია ლიტვაში საგარეო და შინაგან საქმეთა მინისტრებს შეხვდა
საქართველოს და ლიტვის ოფიციალურმა პირებმა ევროკავშირთან უვიზო რეჟიმზე და სამართალდამცავ სტრუქტურებს შორის თანამშრომლობაზე ისაუბრეს.
24 აპრ.'18 17:29
განსხვავებული რეაქციები საქართველოში სომხეთის პროტესტზე
მმართველი პარტიის დეპუტატმა განაცხადა გუშინ, რომ „მთავარია მშვიდი ვითარება და სტაბილურობა ჩვენს სამეზობლოში“.
24 აპრ.'18 12:42
ცხინვალის ლიდერი იალტის ფორუმს დაესწრო და სირიის, იტალიის და სერბეთის დელეგაციებს შეხვდა
ანატოლი ბიბილოვმა 19-21 აპრილს იალტის საერთაშორისო ეკონომიკურ ფორუმში მიიღო მონაწილეობა.

სივილ ჯორჯიას შესახებ
Civil.Ge © 2001-2020, ახალი ამბები საქართველოდან
რეგისტრაციის ადგილი: დოლიძის ქ. 2, IV სართული.
14