აფხაზეთის ხელისუფლების განცხადებით, მათ იპოვეს ზღვაში ჩამოგდებული ქართული უპილოტო მზვერავი თვითმფრინავის ნამტვრევები, იტყობინება ”აფსნიპრესი”.

ამ ნამტვრევების შემოწმების შედეგად, რომელიც ”აფსნიპრესის” ცნობით ადგილობრივ ჟურნალისტებს უჩვენეს, დადგინდა, რომ საშუალო ზომის უპილოტო საფრენი აპარატი ისრაელის კომპანიის Elbit Systems-ის მიერ იყო წარმოებული სერიული ნომრით 551.

Elbit Systems-ი აწარმოებს საშუალო ზომის Hermes-ის ტიპის მზვერავ თვითმფრინავებს.

საქართველოს თავდაცვის სამინისტრომ კატეგორიულად უარყო, რომ მისი მზვერავი თვითმფრინავი იქნა ჩამოგდებული. თუმცა, დაადასტურა, რომ ამ ტიპის თვითმფრინავები გააჩნია.

აფხაზური მხარის ცნობით, თვითმფრინავი შუადღეზე გალისა და ოჩამჩირის ადმინისტრაციულ საზღვართან, სოფელ პრიმორსკოესთან ჩამოაგდეს.

აფხაზეთის თავდაცვის მინისტრის მოადგილის გარი კუპალბას ცნობით, ქართულმა უპილოტო მზვერავმა თვითმფრინავმა აფხაზეთის თავზე ფრენები გასული წლის ზაფხულიდან დაიწყო.