RSS
Mobile
Twitter
Facebook
რესპუბლიკური პარტია ჯერჯერობით ოფიციალურად არ ასახელებს მაჟორიტარ კანდიდატთა ვინაობას, სანამ არ ჩატარდება ოპოზიციურ კოალიციაში შემავალ პარტიებთან კონსულტაციები და არ მოხდება კანდიდატებზე შეთანხმება, რაც ხელს შეუწყობს კოორდინირებულ ქმედებას ამ საკითხში.
რესპუბლიკური პარტიის ლიდერის დავით უსუფაშვილის განცხადებით, პარტია სრულ საარჩევნო მზადყოფნაშია, მათ შორის მაჟორიტარულ ოლქებში კანდიდატების დასახელების კუთხით.
მისი თქმით, უკვე შერჩეულია კანდიდატები თბილისის მაჟორიტარულ ოლქებში წარსადგენად. მათ შორის არიან: ლევან ბერძენიშვილი, ივლიანე ხაინდრავა, თინა ხიდაშელი, ირაკლი ბათიაშვილი, დავით ზურაბიშვილი.
”ჩვენ გვყავს საკმარისი კანდიდატები თბილისის ყველა უბნის მოსაგებად,” - განაცხადა დავით უსუფაშვილმა 31 მარტს გამართულ პრესკონფერენციაზე, ”რესპუბლიკური პარტია ჯერჯერობით თავს იკავებს კონკრეტულ ოლქებში კანდიდატურების დასახელებისგან, ვინაიდან უკვე რამოდენიმე დღეა ველით ჩვენი პარტნიორების, ეროვნულ საბჭოში გაერთიანებული პოლიტიკური პარტიების პოზიციას ამ საკითხზე და ჩვენ კიდევაც მზად ვართ კონსულტაციებისთვის მათთან, რათა მოვახერხოთ კოორდინირებული მოქმედება ამ საკითხში.”
ცოტა ხნის წინ რესპუბლიკური პარტია გამოეყო რვა პარტიისგან შემდგარ ოპოზიციურ კოალიციას და განაცხადა, რომ საპარლამენტო არჩევნებში დამოუკიდებლად მიიღებს მონაწილეობას.
