რუსეთის საგარეო საქმეთა მინისტრმა სერგეი ლავროვმა 2 აპრილს განაცხადა, რომ მთავრობამ ”ზედმიწევნით” უნდა განიხილოს რუსეთის სახელმწიფო სათათბიროს რეზოლუცია აფხაზეთის და სამხრეთ ოსეთის შესახებ, თუმცა იქვე დასძინა, რომ მოსკოვი ”სახელმწიფოების სუვერენიტეტის და ტერიტორიული მთლიანობის” პრინციპის ერთგული რჩება.

რუსეთის სახელმწიფო სათათბირომ 21 მარტს მიიღო რეზოლუცია, რომელიც მოუწოდებს კრემლს განიხილოს აფხაზეთის და სამხრეთ ოსეთის ”დამოუკიდებლობის აღიარების მიზანშეწონილობის” საკითხი. რეზოლუცია, რომელსაც სავალდებულო ძალა არ აქვს, ასევე მოუწოდებს რუსეთის პრეზიდენტს ”გაააქტიუროს აფხაზეთის დ სამხრეთ ოსეთის ტერიტორიაზე მაცხოვრებელი რუსეთის მოქალაქეების უსაფრთხოების დაცვისკენ მიმართული მცდელობები”. რეზოლუცია ასევე შეიცავს ”ქართულ-აფხაზურ და ქართულ-ოსურ კონფლიქტების ზონებში [რუსული] სამშვიდობო ძალების გაძლიერების შესაძლებლობის” განხილვის მოწოდებას.

”უახლოეს მომავალში ჩვენ მოვამზადებთ, შესაბამის სახელმწიფო სტრუქტურებთან თანამშრომლობით, კონკრეტულ შეხედულებებს [სახელმწიფო სათათბიროს რეზოლუციაში] გახმოვანებული წინადადებების საპასუხოდ,” - განაცხადა ლავროვმა სახელმწიფო სათათბიროს სხდომაზე გამოსვლისას, ”რა თქმა უნდა, განსაკუთრებული ინტერესის წყაროა რეზოლუციის ის დებულება, რომელიც მოუწოდებს რუსეთის პრეზიდენტს და მთავრობას განიხილოს აფხაზეთის და სამხრეთ ოსეთის დამოუკიდებლობის აღიარების მიზანშეწონილობის საკითხი. გარწმუნებთ, რომ ეს საკითხი ზედმიწევნით იქნება განხილული, ყველა ფაქტორის გათვალისწინებით. რა თქმა უნდა, ამ ფაქტორებს შორისაა კოსოვოს ცალმხრივი აღიარება, რომელმაც პრეცედენტი შექმნა; ორმაგი სტანდარტების დაუშვებლობაც ამ ფაქტორებს შორისაა”.

თუმცა ამ ფაქტორებს შორის მან ასევე დაასახელა რუსეთის ერთგულება სახელმწიფოთა სუვერენიტეტის და ტერიტორიული მთლიანობის პრინციპების და საერთაშორისო სამართლის უზენაესობის მიმართ. 

”ამჟამად, არსებობს მცდელობები ის თამაშის წესები მოგვახვიონ თავს, რომლებიც ამ პრინციპებს ძირს გამოუთხრის. ახლა ჩვენთვის მნიშვნელოვანია გამოვიჩინოთ სიმტკიცე და შევეწინააღმდეგოთ პროვოკაციების აყოლის ცდუნებას. მნიშვნელოვანია, რომ არ დავუშვათ საერთაშორისო ურთიერთობების არსებული სისტემის განადგურება, როგორც ეს ნათქვამია სახელმწიფო სათათბიროს განცხადებაში,” - განაცხადა ლავროვმა.

მან ასევე განაცხადა, რომ გარკვეული ძალები, რომელთაც მან ”პროვოკატორები” უწოდა, ცდილობენ ძირი გამოუთხარონ აფხაზეთსა და სამხრეთ ოსეთში არსებულ მოლაპარაკებების და სამშვიდობო ფორმატებს. ”მათ უნდათ გამოგვაძევონ ამ მექანიზმებიდან ნებისმიერი საბაბით, ჩვენი სამშვიდობოები დასავლელი სამშვიდობოებით ჩაანაცვლონ,” - განაცხადა ლავროვმა.

”მე სრულიად ვეთახმები სახელმწიფო სათათბიროს განცხადების იმ თეზისებს, რომლებიც უკავშირდება მუშაობის გაგრძელებას არსებულ ფორმატებში აფხაზეთთან, სამხრეთ ოსეთთან და დნესტრისპირეთთან მიმართებაში; აფხაზეთზე, სამხრეთ ოსეთზე და დნესტრისპირეთზე პოლიტიკური, ეკონომიკური და განსაკუთრებით სამხედრო ზეწოლის ნებისმიერ მცდელობის აღკვეთას. ჩვენ კვლავაც მოვითხოვთ აფხაზეთსა და სამხრეთ ოსეთში ალტერნატიული სტრუქტურების შექმნის უკანონო ქმედებების შეწყვეტას,”-  აღნიშნა მან.

”საქართველოს შესაძლო მცდელობა ძალა გამოიყენოს კონფლიქტების მოსაგვარებლად და განსაკუთრებით, ნატოში შესვლა გამოიყენოს ამ მიზნით აბსოლუტურად მიუღებელია,” - განაგრძო ლავროვმა, ”ეს მთლიანად შეცვლის ვითარებას სამხრეთ ოსეთის და აფხაზეთის მოსახლეობისთვის, რომელთა უმეტესობაც რუსეთის მოქალაქეები არიან. რუსეთი  ყოველთვის ემხრობოდა და კვლავაც მიემხრობა თავის თანამოქალაქეებს მათი კანონიერი უფლებების დაცვის და სოციალურ-ეკონომიკური საკითხების თვალსაზრისით. იმედი გვაქვს, რომ მჭიდრო ურთიერთობა გვექნება სახელმწიფო სათათბიროსთან, მათ შორის შესაბამისი საკანონმდებლო ბაზის გაძლიერების კუთხით”.