რუსეთის პრეზიდენტი ვლადიმერ პუტინი იზიარებს აფხაზეთისა და სამხრეთ ოსეთის ლიდერების შეშფოთებას საქართველოს ნატოში შესაძლო გაწევრიანების მოსალოდნელ ნეგატიურ შედეგებთან დაკავშირებით, განაცხადა რუსეთის საგარეო საქმეთა სამინისტრომ 3 აპრილს.

საგარეო უწყების განცხადებაში ნათქვამია, რომ რუსეთის პრეზიდენტმა უპასუხა სეპარატისტი ლიდერების წერილებს, სადაც ისინი გამოთქვამენ ”აფხაზეთისა და სამხრეთ ოსეთის მოსახლეობის სერიოზულ შეშფოთებას საქართველოს ხელისუფლების აგრესიული კურსის გამო, რომელიც მიზნად ისახავს სიტუაციის დესტაბილიზაციას კონფლიქტის ზონებში, საქართველოს მილიტარიზაციას, მათ შორის საიერიშო შეიარაღების ზრდის ხარჯზე”.

”რუსეთის პრეზიდენტის საპასუხო წერილში ნათქვამია, რომ რუსეთი თავის ოფიციალურ განცხადებებსა და პრაქტიკულ ნაბიჯებში თანმიმდევრულად ხელმძღვანელობს საერთაშორისო სამართლის ნორმებით, მყარად გამოდის კავკასიაში სტაბილურობისა და უსაფრთხოების უზრუნველსაყოფად,”- აცხადებს რუსეთის საგარეო უწყება, ”აღნიშნულია, რომ რუსეთში არ შეუძლიათ, რომ არ შეამჩნიონ და არ გაითვალისწინონ ვითარების დესტაბილიზაციისაკენ მიმართული თბილისის კურსი, მათ შორის მუქარებისა და ძალის გამოყენებაზე - თანაც რეგიონის გარეთ მდებარე ქვეყნებზე და ორგანიზაციებზე აქტიური აპელირებით.  პუტინმა გაიზიარა აფხაზეთისა და სამხრეთ ოსეთის ლიდერთა წუხილები საქართველოს ნატოში შესაძლო გაწევრიანების მოსალოდნელ ნეგატიურ შედეგებთან დაკავშირებით”.

”რუსეთის ფედერაციის პრეზიდენტმა ხაზი გაუსვა, რომ რუსეთი სულაც არ არის გულგრილი ორი რესპუბლიკის მოსახლეობის, იქ მცხოვრები რუსეთის მოქალაქეების წუხილების და პრობლემების მიმართ. ამიტომაც აფხაზეთის და სამხრეთ ოსეთის მხარდაჭერას ექნება არა დეკლარაციული, არამედ საგნობრივი ხასიათი. სწორედ ამ მოსაზრებებით იყო მოტივირებული რუსეთის ამასწინდელი გადაწყვეტილება სავაჭრო-ეკონომიკურ, ფინანსურ, სატრანსპორტო და სხვა კავშირებზე არსებული აკრძალვების მოხსნის თაობაზე აფხაზეთთან. რუსეთში ფიქრობენ, რომ ასეთი ნაბიჯი მოემსახურება რეალური წვლილის შეტანას აფხაზეთის სოციალურ-ეკონომიკურ განვითარებაში და ღირსეულად შეფასდება მისი მოსახლეობის მიერ”.