რუსეთის უშიშროების საბჭომ შესაძლოა მალე განიხილოს კონკრეტული წინადადებები აფხაზეთთან ეკონომიკური და პოლიტიკური ურთიერთობების გაღრმავების მიზნით მას შემდეგ, რაც მოსკოვმა მიიღო გადაწყვეტილება თვითგამოცხადებულ რეგიონს სანქციები მოუხსნას, წერს რუსული გაზეთი ”კომერსანტი” 7 აპრილს.  

გაზეთის ცნობით, წინადადებათა პაკეტი შეიცავს თანამშრომლობას საბანკო სექტორში, მათ შორის შეღავათიანი კრედიტების გაცემას აფხაზეთის ეროვნული ბანკისთვის 5%-იანი საპროცენტო განაკვეთით; ორმაგი დაბეგვრის მოხსნას და აფხაზეთის ინტეგრაციას რუსეთის საბაჟო სისტემაში; საერთაშორისო საზღვაო კავშირებს სოხუმის, ოჩამჩირის და ბიჭვინთის პორტებთან, ასევე სოხუმის აეროპორტის ამოქმედებას.

”კომერსანტის” ცნობით, აფხაზური მხარე გამოდის ინიციატივით, რომ რუსული პასპორტების მქონე აფხაზეთის მაცხოვრებლები რუსეთის სოციალური დახმარების პროგრამებში ჩაერთონ და რუსული პენსიები მიიღონ. ”აფხაზეთში რუსეთის ფედერაციის დიპლომატიური მისიის გახსნა შესაძლოა კულმინაცია გახდეს [ამ პროცესის],” - წერს ”კომერსანტი”.

პრეზიდენტმა პუტინმა გასულ კვირას გაგზავნილ წერილში განუცხადა აფხაზეთისა და სამხრეთ ოსეთის ლიდერებს, რომ რუსეთი გააღრმავებს თანამშრომლობას ორ რეგიონთან. ”რუსეთი სულაც არ არის გულგრილი ორი რესპუბლიკის მოსახლეობის, იქ მცხოვრები რუსეთის მოქალაქეების წუხილების და პრობლემების მიმართ. ამიტომაც აფხაზეთის და სამხრეთ ოსეთის მხარდაჭერას ექნება არა დეკლარაციული, არამედ საგნობრივი ხასიათი,” - განაცხადა რუსეთის საგარეო უწყებამ 3 აპრილს.

პრეზიდენტმა სააკაშვილმა ამის საპასუხოდ განაცხადა, რომ პრეზიდენტ პუტინის ეს ქმედება იყო ”დაუფიქრებელი და აბსოლუტურად მიუღებელი და სახიფათო - უპირველეს ყოვლისა, თავად რუსეთისთვის”.