ქართული მხარე რუსეთის ვაჭრობის მსოფლიო ორგანიზაციაში (ვმო) გაწევრიანებისთვის ორმხრივი მოლაპარაკებების დაწყების სანაცვლოდ მოითხოვს მოსკოვისგან იმ გადაწყვეტილების გაუქმებას, რომელიც საქართველოს თვითგამოცხადებულ რეგიონებთან პირდაპირი ეკონომიკური კონტაქტების დამყარებას ითვალისწინებს.

”საქართველო თავის პოზიციას არ ცვლის და აცხადებს, რომ ორმხრივი მოლაპარაკებები რუსეთთან მსოფლიო ორგანიზაციაში  შესაძლო გაწევრიანებასთან დაკავშირებით გაგრძელდება მას შემდეგ, რაც რუსეთი აპრილში რუსეთის პრეზიდენტის მიერ მიღებულ გადაწყვეტილებას გააუქმებს,” - განუცხადა ეკონომიკური განვითარების მინისტრის მოადგილემ თამარ კოვზირიძემ Civil.ge-ს.  

იგი დღეს საქართველოს დელეგაციას ხელმძღვანელობდა ჟენევაში გამართულ მრავალმხრივ შეხვედრაზე, სადაც რუსეთის ვმო-ში გაწევრიანების საკითხი განიხილებოდა.

კოვზირიძის განცხადებით, ასევე ძალაში რჩება ქართული მხარის მოთხოვნა საქართველოს კონფლიქტის ზონებში მდებარე ორი არალეგალური გამშვები პუნქტის - განთიადი-ადლერის და როკი-ქვემო ზარამაგის - ლეგალიზების თაობაზე, რაც რუსეთთან ორმხრივი მოლაპარაკებების წამყვან საკითხს წარმოადგენს.

მისი ინფორმაციით, მომდევნო შეხვედრა 16 ივნისს კვლავ ჟენევაში გაიმართება.