საქართველოს შეიარაღებული ძალების სამშვიდობო ოპერაციების შტაბის უფროსმა მამუკა ყურაშვილმა განაცხადა, რომ მან 7 აგვისტოს ღამით ”იმპულსური” განცხადება გააკეთა, როცა ტელევიზიით განაცხადა, რომ ცხინვალის რეგიონში ქართული ძალები კონსტიტუციური წესრიგის აღდგენის ოპერაციას ატარებდნენ.

მან ეს განცხადება დღეს აგვისტოს მოვლენების შემსწავლელი დროებითი კომისიის სხდომაზე ჩვენების მიცემისას გააკეთა მას შემდეგ, რაც 27 ოქტომბერს კომისიის წინამორბედ სხდომაზე რეინტეგრაციის საკითხებში სახელმწიფო მინისტრმა თემურ იაკობაშვილმა და მოგვიანებით, იმავე დღეს უშიშროების საბჭოს მდივანმა კახა ლომაიამ ხაზი გაუსვეს, რომ ყურაშვილმა 7 აგვისტოს ცნობილი განცხადება თვითნებურად გააკეთა.

”ეს არ ყოფილა არავისთან შეთანხმებული და არავის დავალება მე არ მქონია,”- განუცხადა ყურაშვილმა კომისიის წევრ დეპუტატებს, ”ალბათ თქვენ ტელევიზიით არ იცით რა არის საომარი მოქმედებები უშუალოდ. მე ვიყავი ბრძოლიდან გამოსული და ჟურნალისტი, რომელიც შემომეყარა  - ბრიფინგი მომზადებული არ იყო - შესაბამისად, მეც მომზადებული არ ვიყავი და გავაკეთე იმპულსური განცხადება, რომელზეც სხვათა შორის მომზადებული რომ ვყოფილიყავი, სხვანაირ განცხადებას გავაკეთებდი”.

იაკობაშვილმა 27 ოქტომბერს კომისიას განუცხადა, რომ კონსტიტუციური წესრიგის აღდგენის ბრძანება არ ყოფილა უმაღლეს დონეზე გაცემული, თუმცა ყურაშვილის განცხადება რუსეთმა გამოიყენა PR-თვის, თითქოს ქართული მხარე პრობლემას ძალის გამოყენებით აგვარებდა.

ლომაიამ ასევე განაცხადა, რომ ყურაშვილის განცხადება არ ყოფილა სანქცირებული და მისი არსი არასწორი იყო. მან ასევე აღნიშნა, რომ ყურაშვილმა ამისთვის საყვედური მიიღო.

”მე საყვედური მივიღე გაერთიანებულ შტაბში,” - დაადასტურა დღეს ყურაშვილმა.

მან ასევე უარყო აგვისტოში გავრცელებული ხმები იმის თაობაზე, რომ ყურაშვილის გაუჩინარება მის სავარაუდო დაპატიმრებას უკავშირდებოდა.

”მე კანტუზია მქონდა. დაკავება ეს დეზინფორმაცია იყო,”- განაცხადა ყურაშვილმა.