აგვისტოს მოვლენების დროს ქართულ მხარეს ამერიკელი, ჩეხი, თურქი, უკრაინელი და ჩეჩენი დაქირავებული მებრძოლები იღებდნენ საომარ მოქმედებებში მონაწილეობას, განაცხადა რუსეთის პროკურატურის საგამოძიებო კომიტეტის ხელმძღვანელმა ალექსანდრე ბასტრიკინმა.
”საგამოძიებო ჯგუფმა, რომელიც შექმნილია საქართველოს მიერ აგრესიის ფაქტის გამოსაძიებლად, დაამტკიცა, რომ მაშინ მოქმედებდნენ ამერიკული, ჩეხური, თურქული, უკრაინული და ჩეჩნური დაქირავებული მებრძოლთა ჯგუფები,”- იუწყება ”ინტერფაქსი” 24 ნოემბერს ბასტრიკინის სიტყვებზე დაყრდნობით.
მოგვიანებით მან უთხრა ჟურნალისტებს, რომ საქართველოს მხარეზე ასევე იბრძოდა ბალტიისპირეთის სახელმწიფოების რამდენიმე მოქალაქე.
”თუმცა ისინი ცოტანი იყვნენ და ძირითადად დამხარეების როლში გამოდიოდნენ,” - განაცხადა ბასტრიკინმა, ”ასევე იყო ორი სნაიპერი... ერთი უკრაინიდან და მე მგონი ლატვიელი ქალი”.
საქართველოს ეროვნული უშიშროების საბჭოს მდივანმა ალექსანდრე ლომაიამ ”როიტერთან” საუბარში განაცხადა, რომ რუსული მხარის განცხადებები ”აბსურდული” და ”ფანტაზიის” ნაყოფია.
რუსეთის პროკურატურა ”მკვლელობისა” და ”გენოციდის” მუხლებით აგვისტოდან მოყოლებული იძიებს სამხრეთ ოსეთის წინააღმდეგ საქართველოს ”აგრესიის” ფაქტს.