მთავრობაში საკადრო ცვლილებების შედეგად თავდაცვის მინისტრს დავით კეზერაშვილს მისი მოადგილე ბათუ ქუთელია შეცვლის, რომელსაც მინისტრის ”მოვალეობის შესრულება” დაევალა; ხოლო საგარეო საქმეთა სამინისტროს ეკა ტყეშელაშვილის ნაცვლად მისი ყოფილი მოადგილე და ამჟამინდელი კულტურის მინისტრი გრიგოლ ვაშაძე ჩაუდგება სათავეში, განაცხადა დღეს გამართულ ბრიფინგზე პრემიერ-მინისტრმა გრიგოლ მგალობლიშვილმა.

ამას გარდა, მისი თქმით, გია ნოდიას განათლებისა და მეცნიერების მინისტრის პოსტზე ნიკა გვარამია, ყოფილი იუსტიციის მინისტრი შეცვლის, რომელმაც ეს პოსტი 1 ნოემბერს განხორციელებული სამთავრობო ცვლილების დროს დაკარგა.

მგალობლიშვილის განცხადებით, მან კულტურის, ძეგლთა დაცვის და სპორტის მინისტრის თანამდებობა შესთავაზა რუსეთში საქართველოს ყოფილ ელჩს ზურაბ აბაშიძეს, რომელიც, პრემიერის განცხადებით, საბოლოო გადაწყვეტილებას ერთი დღის ვადაში მიიღებს.

სამთავრობო ცვლილებების შესახებ ცნობილი გახდა ცოტა ხნის შემდეგ, რაც გავრცელდა ინფორმაცია გაეროში საქართველოს ელჩის ირაკლი ალასანიას გადადგომის თაობაზე. 

ამ ინფორმაციაზე გრიგოლ ვაშაძემ განაცხადა, რომ მან ამის თაობაზე არაფერი იცის და ასევე აღნიშნა: ”აბსოლუტურად დაზაფრული ვარ, ნახევარი საათის წინ გავიგე ეს [საგარეო საქმეთა მინისტრად დანიშვნის] ამბავი”. 

მან, იმავდროულად, მოუწოდა საგარეო საქმეთა მინისტრის ყველა მოადგილეს და ელჩებს დაწერონ განცხადება თანამდებობიდან წასვლის თაობაზე.

”ირაკლი ალასანიამ ასე თუ ისე უნდა დატოვოს თანამდებობა, იმიტომ, რომ ეს შეეხება ყველა ელჩებს,”- განუცხადა ვაშაძემ ჟურნალისტებს, ”არავითარი კადრების დაწიოკება არ იქნება, მაგრამ ჩვენ სერიოზულად განვიხილავთ ყველა კანდიდატურას განსაკუთრებით იმ ჭრილში, თუ როგორ გამოიჩინა ან პირიქით, არ გამოიჩინა ამ ხალხმა თავი ომის პირობებში. მე სამინისტროში ვიყავი, ყველაფერი ვიცი”.

მან ასევე ხაზი გაუსვა, რომ საქართველოს საგარეო პოლიტიკური ვექტორი არ შეიცვლება.

პრემიერ-მინისტრმა განაცხადა, რომ მან საკადრო ცვლილებებზე გადაწყვეტილება მიიღო მთავრობის მუშაობაზე ერთთვიანი დაკვირვების შემდეგ, ”რათა მე გადამეწყვიტა რა მიმართულებებით იყო საჭირო მთავრობის განახლება”.

მისი თქმით, მან ახალი მინისტრების კანდიდატურები შეათანხმა პრეზიდენტთან და პარლამენტის თავმჯდომარესთან.

მგალობლიშვილმა მადლობა გადაუხადა თავდაცვის ყოფილ მინისტრს დავით კეზერაშვილს, რომელმაც ”ძალიან რთულ პერიოდში მნიშვნელოვან გამოწვევებს გაართვა თავი”, თუმცა ”ახლა არის დრო, რათა მოხდეს ახალი ენერგიით ამ მიმართულებებზე მუშაობა”. 

მან ასევე განაცხადა, რომ საგარეო მიმართულებაზე, სადაც საქართველოს ”მნიშვნელოვანი მანქანა” უპირისპირდება, აუცილებელია უფრო მეტი გამოცდილება. 

”მე მინდა დიდი მადლობა გადავუხადო ეკა ტყეშელაშვილს და ქართველ დიპლომატებს, რომლებმაც ქვეყნისათვის უმნიშვნელოვანეს დროს ძალიან მნიშვნელოვან გამოწვევებსა და სირთულეებს გაუძლეს და ძალიან წარმატებით საქმიანობდნენ,”- აღნიშნა მგალობლიშვილმა. 

მან ბრიფინგი ჩაატარა გრიგოლ ვაშაძესთან და ნიკა გვარამიასთან ერთად. ამ უკანასკნელმაც აღნიშნა, რომ მისთვის განათლების მინისტრის პოსტის შეთავაზება ასევე ”მოულოდნელი” იყო.

”ჩვენ ვფიქრობთ, რომ ლიბერალური ფასეულობები, რომელიც არის დანერგილი განათლების სისტემაში ძალიან მნიშვნელოვანია, მაგრამ ასევე ძალიან მნიშვნელოვანია და ვფიქრობთ, რომ გავაძლიეროთ ეროვნული ფასეულობები, რომელსაც დაეფუძნება ქართული განათლების სისტემა,”- განაცხადა გვარამიამ ბრიფინგზე.

მთავრობაში განხორციელებულ ცვლილებებს პარლამენტის თანხმობა არ დასჭირდება, რადგან ამისთვის მინისტრთა კაბინეტის 1/3-ით შეცვლაა საჭირო.