აშშ-ის თავდაცვის დეპარტამენტი მისი ევროპული სარდლობის მეშვეობით ეძებს გზებს, თუ როგორ დაეხმაროს ქართულ არმიას, განაცხადა აშშ-ს ევროპული არმიის და მე-7 არმიის სარდალმა, გენერალმა კარტერ ჰემმა 17 თებერვალს. 

კითხვაზე არსებობს თუ არა ქართველი სამხედროების გაწვრთნის გეგმა, გენერალმა ჰემმა უპასუხა: ”ამის რაიმე გაწერილი გრაფიკი ჯერ არ გვაქვს. ევროპული სარდლობა დეპარტამენტთან ერთად კვლავაც აანალიზებს იმ შეფასების შედეგებს, რომელიც შარშან შემოდგომაზე ჩატარდა იმ მიზნით რომ გაგვერკვია თუ როგორ უფრო მართებული იქნება დახმარება”. 

მისი თქმით, ერთის მხრივ აშშ-ის შეუძლია ტაქტიკურ ხასიათის დახმარების გაწევა.  

”ეს არის იარაღის და აღჭურვილობის გამოყენების ტექნიკა - ეს არის სატვირთო მანქანები და რადიოები, ტრეინინგები პირველად დახმარების და მსგავსი რაღაცეები - ანუ დახმარება ძირითადი სამხედრო უნარებში,” - განაცხადა მან, ”მეორე მხრივ, ეს შეეხება სამეთაურო და კონტროლის სფეროებს. ქართველებმა გვთხოვეს ამ კუთხით გარკვეული დახმარება”.

”დეფიციტია აღჭურვაში. ხერვეზებია სამეთაურეო და კონტროლის სფეროში. ასევე ტაქტიკურ შესაძლებლობებში,” - განაცხადა ამერიკელმა გენერალმა, ”ვფიქრობ, ქართველებსაც გააზრებული აქვთ ეს”.

”თუმცა, საქმე არც ისე ცუდადაა. მნიშვნელოვანია გვახსოვდეს, რომ ის მომზადება, რომელიც მათ გავუწიეთ წლების წინ, მიზნად ისახავდა ექსპედიციური შესაძლებლობების განვითარებას, რათა ერაყში განეხორციელებინათ ოპერაციები. და ამ კუთხით მათ ძალიან, ძალიან კარგი სამუშაო გაწიეს. ისინი არ ყოფილან მომზადებული ტერიტორიის დაცვისათვის”.

ამ კონტექსტში, მან განაცხადა, რომ ამჟამად იმის შეფასება მიმდინარეობს, თუ როგორ უნდა შეიცვალოს დახმარების ”დოქტრინა, ჩვენი ტაქტიკა”.

გენერალმა ჰემმა ასევე განაცხადა, რომ ცოტა ხნის წინ საქართველოში სტუმრობამ მასზე ”შთაბეჭდილება” მოახდინა.

”მათ კარგი საწვრთნელი ობიექტები აქვთ. აშენებენ ინფრასტრუქტურას პერსონალისთვის და ახორციელებენ პროგრამებს, რომლებიც საჭიროა შესაფერისი პერსონალის ასაყვანად,” - განაცხადა მან, ”მათ დახმარება სურთ. და თუ ამისთვის  რაიმე გზები არსებობს, ვფიქრობ, ევროპული სარდლობა გაიკვლევს გზას აქეთ”.