სეპარატისტული აფხაზეთის პარლამენტმა 6 აგვისტოს გააუქმა თავისი გადაწყვეტილება მოქალაქეობის შესახებ კანონში ცვლილების შეტანის თაობაზე, რომლის თანახმადაც გალის რაიონში მცხოვრები ათასობით ეთნიკური ქართველი აფხაზური მოქალაქეობის მიღებას შეძლებდა.

ამ გადაწყვეტილებამდე ექვსი დღით ადრე სეპარატისტულმა პარლამენტმა მიიღო ცვლილება, რამაც ოპოზიციური ჯგუფების პროტესტი გამოიწვია.

საინფორმაციო სააგენტო ”აფსნიპრესი” იტყობინებოდა, რომ აფხაზეთის ლიდერმა სერგეი ბაღაფშმა ცვლილება, რომლისთვისაც იგი კანონის ძალის მინიჭებას აპირებდა, უკანვე დაუბრუნა პარლამენტს ”გადასახედად”.

ერთობლივ განცხადებაში აფხაზ ხალხთა ერთობის ფორუმმა, აფხაზეთის ომის ვეტერანთა კავშირმა და საზოგადოებრივმა მოძრაობა ”ახაცა” დაგმეს ცვლილება, რომელიც აფხაზმა დეპუტატებმა 31 ივლისს მიიღეს და მას აფხაზეთის სახელმწიფოებრიობის წინააღმდეგ მიმართული ნაბიჯი უწოდეს.

”ამ მომენტიდან ქართული ეროვნების აფხაზეთის მოქალაქეები იმდენივე გახდნენ, რამდენიც აფხაზური ეროვნების,” - განაცხადეს მათ 3 აგვისტოს გავრელებულ ერთობლივ განცხადებაში.

ოპოზიციის თქმით, ხელისუფლებამ ეს გადაწყვეტილება წელს დაგეგმილი საპრეზიდენტო არჩევნების წინ მიიღო, რადგანაც სწორედ გალის რაიონში მცხოვრები ეთნიკური ქართველების ხმების იმედი აქვს.