რუსეთში ყოფილი ელჩის, ტელეკომპანია ”რუსთავი 2”-ის დამფუძნებლის ეროსი კიწმარიშვილის ”რუსთავის მედია მართვის კომპანიას” დამფუძნებლების გადაწყვეტილებით ტელეკომპანია ”მაესტრო” მართვის უფლებით 3 წლის ვადით გადაეცა.

ტელეკომპანია ”მაესტროს” დამფუძნებელმა მამუკა ღლონტმა 12 ნოემბერს პრესკონფერენციაზე განაცხადა, რომ ხელშეკრულებაში, რომელიც უახლოეს პერიოდში გაფორმდება, ჩადებული იქნება ტელევიზიის სარედაქციო დამოუკიდებლობის შენარჩუნების საკითხი.

მისი თქმით, ეს არ ნიშნავს მაესტროს გაყიდვას. მისი თქმით, კომპანია მასთან ერთად ათ დამფუძნებელს ეკუთვნის და თითოეულის წილი 10%-ია.

”აქვე მინდა დავაზუსტო, რომ მაესტროს არც ერთი პროცენტი, წილი არ გაყიდულა არც ქალბატონ ნინოზე [ბურჯანაძე], არც ბატონ ირაკლიზე [ალასანია] და არც სხვა ადამიანებზე,”- განაცხადა ღლონტმა, ”ეს ლეგენდები და ზღაპრები დროა უკვე დამთავრდეს”.

იმავე პრესკონფერენციაზე კიწმარიშვილმა განაცხადა, რომ ეს გარიგება არ ნიშნავს, რომ მამუკა ღლონტი სრულად გამოეთიშება ტელეკომპანიის მართვას.  ”პრინციპულ საკითხებზე მამუკას ექნება ვეტოს უფლება,”- აღნიშნა მან.

კიწმარიშვილის განცხადებით, მან ასეთი ტიპის თანამშრომლობა მას შემდეგ შესთავაზა ”მაესტროს”, როცა მის ეთერში იხილა ვიდეო-რგოლები, რომელშიც ტელეკომპანია მაყურებელს ფინანსურ თანადგომას თხოვდა. დაფინანსების საკითხთან დაკავშირებით ეროსი კიწმარიშვილმა განაცხადა, რომ ეს არის ერთ-ერთი ასპექტი, რომელზეც ”აქტიური მუშაობა მომიწვეს”.

”ის შესაძლებლობა, რაც მე გამაჩნია -  ინტელექტუალური იქნება ეს, თუ სხვა ტიპის, სასურველია მოვახმარო იმ კომპანიას, რომელიც ფაქტიურად თითქმის უნიკალურ სიტუაციაში აღმოჩნდა დღეს, რომელსაც უწევს ბრძოლა არა მარტო არსებობისათვის, არამედ სიტყვის თავისუფლების დასაცავად ელექტრონულ მედიაში,”  - განაცხადა ეროსი კიწმარიშვილმა.

კიწმარიშვილის თქმით,  არხს ექნება ”ძალიან ობიექტური ახალი ამბების ნიშა” და ამით ”განსხვავებული იქნება ეს არხი სხვა დანარჩენი არხებისაგან”.